洪承畴

洪承畴（1593年10月16号－1665年4月3号），字彦演，号亨九，八闽泉州府南安县英都（今朝英都镇良山村）人，明朝挨末阶段个有名大臣，也是清帝国早期有名个大臣，因为自家勒明末清初个所作所为，成为一个邪气有争议个人物。

明末辰光个洪承畴

洪承畴出生勒贫民屋里，小辰光帮伊娘兜售豆干，十一岁辍学，之后苦练做题，廿二岁就考上举人，次年（万历四十四年）考上进士，从此脱离贫穷，成为士大夫。

之后，伊先后担任过刑部江西司主事，员外郎、郎中等职务，后首来，因为有胆量，到第一线去镇压流寇，所以名声慢慢高起来，成为明末文人当中极少数能够真正带兵个士大夫，也因此官运亨通，崇祯四年就当上陕西个三边总督，管辖交关军队，同李自成、张献忠之类个流寇，进行过交关趟战争。

之后，洪承畴又进一步高升，成为兵部尚书。崇祯十四年，山海关外头情况危急，朱由检就派有“剿匪”经验个洪承畴，担任蓟辽总督，统辖八个总兵，十几万人，去锦州援救祖大寿，由此爆发松锦之战。迭个战役当中，洪承畴因为畀朱由检越级指挥，导致大败，伊自家也畀清军活捉。个辰光，交关明朝人侪认为伊已经为国尽忠死脱，朱由检甚至勒北京设置伊个衣冠冢祭祀。

投降清帝国之后洪承畴

但事实上，洪承畴弗曾死脱，伊投降皇太极，成为清朝首位汉人大学士，并且为多尔衮器重。甲申之变后，洪承畴劝说多尔衮迁都北京，并且打出为朱由检报仇个招牌，拉拢华北地区士大夫。之后，又奉命前往太湖平原周边，对清帝国新平定个江南地区吴越人，开展恩威并施个拉拢工作，迭个阶段，也发生过夏完淳同伊对质个经典故事。之后，伊因为爸爸死脱，修养过一段辰光。

1653年，为面对云贵高原地区，以朱由榔作为招牌，对抗清帝国个孙可望、李定国势力，清廷又拿洪承畴启用，并赐伊太保兼太子太师，经略湖广、广东、广西、云南、贵州五省，总督军务兼理粮饷个重要任务。同另外一个投降清帝国个明帝国高级军官吴三桂合作，经历好几年，慢慢拿李定国势力分化瓦解。

1661年，洪承畴因为对清帝国个劳苦功高，畀授予三等阿达哈哈番（轻车都尉）爵位，并可以世袭。四年之后，洪承畴死脱。