虹口

虹口，上海地区名，勒拉上海市中心城区，吴淞江搭仔黄浦江交汇处北面个一块地区。原先特谓指今朝虹口区南部搭仔闸北区东南部地区，现在也用来指代虹口区。

远处桥下头个河口就是虹口

名字个由来

虹口箇只名字是从河口个名字来个。元代以前，吴淞江个河道勒拉现在个北侧。作为吴淞江个支流，上海浦从十六铺东面出发，向北流经宋家浜搭范家浜个（宋家浜就是今朝吴淞江市区段，范家浜是苏州河口到庆宁寺当中箇段黄浦江），再向北流到今朝虹口港河道浪个嘉兴路桥附近流进吴淞江故道。元代以后，上海浦河道逐渐畀黄浦用脱。

明隆庆三年（1569年），海瑞疏浚吴淞江，让水从宋家浜流出去。乘枪势里，黄浦变成功太湖个泄洪主河道，吴淞江则变成功黄浦江个支流，原上海浦入吴淞江故道河口附近个河道留拉，叫沙洪，伊流进黄浦个河口叫洪口。

清代中期，沙洪浪造起座拱桥，也就是通常讲个虹桥。上海开埠以后，洪口逐渐写成虹口，用到现在。

发展历史

上海开埠前，虹口两岸已经有小规模个集镇，叫内外虹口市。1848年，美国传教士买进英租界边浪个虹口一带土地，也就是上海美租界。1863年，上海道正式同美国签订条约，确定现在个武进路以南一带区域均畀美租界。租界弗断扩张，虹口个概念也弗断扩张，逐渐变成苏州河北面个租界个统称。经过多趟个租界扩张搭仔越界造路，虹口好表示个地方弗只本生一块地方，还有今朝闸北区东南部、四川北路中段、北段直到虹口公园。

抗日战争胜利以后，1947年，上海市政府更改行政区划名字，拿数字编号改成地名。原十六区更名成虹口区，虹口箇只词正式成为行政区划个名字。1949年以后，虹口区经历多轮行政区划改革，到2011年，虹口广义上好讲南到苏州河，北到江湾镇，东到杨浦，西到闸北个咾大一块地方。