吳淞江

(从吴淞江转戳到箇里)

吳淞江東亞上海市區內河段習稱蘇州河(Soochow Creek),古稱松江吳江,亦名松陵江笠澤江[1],原爲長江入海前着末一條支流,明代朝後成爲黃浦江支流。吳淞江發源於蘇州市吳江區松陵鎮以南太湖沿岸个瓜涇口[2],由西望東,勒拉今上海黃浦公園北側外白渡橋以東匯入黃浦江,全長125公里。

蘇州河口匯入黃浦江

地名來源 编辑

吳淞江,開初稱松江。蒙元至元十五年(1278年)華亭府更名爲松江府後,松江改叫吳淞江。上海開埠後,來滬外國人曾溯河朝上,發覺好趁船直抵蘇州府城,乃末英文標準譯名就變成功“Soochow Creek”[3]。1848年,上海道臺搭英國駐滬領事簽訂展拓英租界條約個歇,頭一趟勒正式文本裏向,擔吳淞江稱爲仔蘇州河,後手來上海市區个民眾也逐眼開始叫伊叫蘇州河[4]。但蘇州河北新涇開始个上游地區民眾搭教科書等官方仍舊稱之爲吳淞江[5]

地理水文概況 编辑

吳淞江,古太湖地區个三江之一(據《四庫全書總目提要•卷十四•經部十四○書類存目二》:其訓《禹貢》“三江”,既以松江、婁江、東江爲三江咾啥),隨太湖地區个逐漸成陸而弗斷向東綿延。東晉時期,吳淞江入海口勒拉今上海青浦區白鶴鎮西北个滬瀆村[2]唐代中期,入海口移至今上海虹口區頂北端个江灣鎮以東。北宋時期,吳淞口移至今浦東高橋鎮附近个南蹌浦口,後最終由大蹌浦口,即今吳淞口長江[6]

吳淞江早期作爲太湖个下泄水道,河流寬闊。唐代个吳淞口寬達二十里,隨後逐漸淤塞,至永樂初疏浚河道前,吳淞江只有150丈闊。目前吳淞江東西裏狹、當中橫裏由蘇州至甪直一段闊,頂闊個場許有得6、700米橫裏,上海市區段頂狹个場許只有得四五十米。

吳淞江受潮汐影響程度一般,地理學上向叫感潮河流。潮水來个辰光,潮流頂遠好達到嘉定黃渡附近;受潮水影響咾水位發生變化个河段頂遠是在拉青浦趙屯鄉附近。吳淞江河流比降平緩,由黃渡至河口段,河底个比降僅爲0.085‰。黃浦公園附近河口个多年平均潮位大概是3.12米,潮差1.83米。上游北新涇段高潮位2.78米,平均潮差0.72米[2]

水利 编辑

疏浚情況 编辑

 
治理吳淞江个海瑞

吳淞江个水利興修好溯至唐元和年間。元和五年(810年),地方政府勒當時个松江華亭縣青龍鎮段修建河堤[7]。延及北宋慶曆二年,自太湖至松江口(即松江出海口)全線堤壩修築完畢,史稱吳江塘路[8]。吳江塘路修建之後,松江水流蜿蜒曲折,乃末使得下游河道逐漸淤積,松江口寬度日趨狹小。

當時,吳淞江以南支流共96條,以北支流共82條,較大个河灣共五處,稱之爲五匯,較小个河灣共42處,稱之爲四十二彎。五匯,即白鶴匯、顧浦匯、安亭匯、盤龍匯搭河沙匯,眼大小彎道弗單減慢河水流速使下游淤積,外加勒潮汛期經常引發水患。自宋寶元元年起,當地政府採用裁彎取直个方法整理五匯。當年,勒拉華亭交昆山間个盤龍匯畀裁直,整修後个水道由四十里減至十里,工程完成後“道直流速,其患遂弭”[9]。北宋嘉祐六年(1061年),白鶴匯畀裁直。熙寧年間,白鶴匯與盤龍匯之間个顧浦匯畀裁直。迭三次裁彎取直以後,吳淞江个航運條件大幅改善,河道排水能力大幅提高。

但至北宋末宋徽宗崇寧二年(1103年),吳淞江下游潮泥淤積,水患復發。時任兩浙路提舉常平司个徐確通過考證《禹貢》中關於三江个內容,確定吳淞江古道,乃末上奏開挖自封家渡古道至大通港,但嘸沒幾許辰光河口重新畀泥沙淤積煞,水患再度氾濫[10][11]。宋大觀三年,兩浙路監使重新疏浚吳淞江,共設置十二閘,以防長江河沙重新淤塞松江口。

雖然兩宋三百餘年,連續弗斷个疏浚整修吳淞江也無法避免河流日漸萎縮个情況,但吳淞江个淤塞狀況朆到達嚴重个地步。直到蒙元至元十四年,外海搭長江个大型商船仍能自吳淞江駛入,並直抵蘇州个葑門。但此後,到大德八年(1304年),下游河道淤塞情況日趨嚴重。蒙元大德八年,時任海道千夫長个任仁發重新疏浚吳淞江[12],西起當時上海縣邊界个吳淞江,東抵當時嘉定縣个石橋浜。工程全長三十八里八十一步三尺,水道深一丈五尺,河面寬二十五長。之後元泰定元年(1324年)、至正元年(1341年),地方官員又兩趟疏浚吳淞江,但始終衹不過解決一時个問題,吳淞江逐漸萎縮个狀況朆改觀歇。

明洪武年間,吳淞江下游基本淤積成爲陸地,黃浦(上海開埠後稱黃浦江)匯入吳淞江个黃浦口个情況同樣嚴重難以疏浚[13]。明永樂元年,蘇州、松江兩府地區發生大規模水患。明政府派戶部右侍郎个夏元吉疏浚河道、弭平水患。夏元吉到任後,一方面採用元代周文英个觀點,引太湖水從瀏河、白茆入長江,即“掣淞入瀏”。[14]另一方面伊擔黃浦引入範家浜經吳淞口入長江,乃末吳淞口成爲了黃浦江而弗是吳淞江个入河口,史稱“黃浦奪淞”。但此舉擔吳淞江原先个上游來水進行分流,反而加速仔吳淞江个萎縮。明天順二年,太湖流域大水,告咾疏浚西起大盈浦、東至吳淞江巡司个下游河道。此後勒拉成化十年、嘉靖元年分別兩趟疏通吳淞江中游交上游河道。

明隆慶三年,時任南京都察院右僉都禦史巡撫應天十府个海瑞整治吳淞江搭黃浦流域[15]。迭趟疏浚,擔黃渡起至今福建路橋附近个河段由原寬三十丈縮減到十五丈,河床底部寬七丈五尺。迭趟疏浚完成後,吳淞江下游呈現出今朝看到个流向。迭歇,吳淞江勒近外白渡橋附近進入黃浦个範家浜河道,徹底成爲黃浦江个支流哉。

 
清朝上海个吳淞江畔停泊个沙船

滿清時期,吳淞江下游疏浚依舊頻繁,1670年,太湖水災,翌年疏浚吳淞江。1673年,今福建路橋附近修建閘橋一座俗稱老閘橋,17年後坍廢[16]。1735年,勒金家灣即今大統路段新建閘橋,俗稱新閘橋[16]。1763年,吳淞江黃渡鎮段,因河彎水淺,而沿岸遍佈民居,告咾勒拉鎮南新開河道,稱之爲越河[2]。1827年,曹家渡上游區段疏浚,同時拆脫新閘橋。

1861年起,機器挖泥船開始用於吳淞江个河道疏浚。1914年6月,江南水利局成立吳淞江水利工程局,並分別於1919年、1920年、1924年分段疏通黃浦江下游區段个河流。1931年起至1937年,上海市工務局委託上海浚浦局開挖底泥。6年間共挖出底泥133萬立方米。1950年,蘇州河口至滸浦段進行底泥挖掘施工。此後个1963年、1979年、2011年分別進行了吳淞江个河道疏浚工程。

治汙工程 编辑

 
1987年河口段受汙个吳淞江河水

1910年以前,上海个工業尚處起步階段,蘇州河水質朆受到歇污染。1911年,閘北水廠勒今恒豐路橋附近建造,2年後建成。閘北水廠採用蘇州河水作爲水源。但隨蘇州河沿岸工業區个興起,沿河工廠擔污水紛紛排入蘇州河。自1920年起,每逢暑期高溫來臨,蘇州河水便出現嚴重污染个狀況。水中溶氧量爲零,氮氨高達5毫克/升以上,外加水中有毒物質酚達到0.6毫克/升。1924年,由於蘇州河水質情況極爲嚴重,已經無法滿足飲用水个水源最低標準,閘北水廠被迫搬遷至軍工路,改用黃浦江水作爲水源。1949年,污染區域擴大到吳淞江中山西路橋段。1956年,北新涇段水質也遭到污染。1977年,受汙區域擴展至黃渡段,市區段河流魚蝦絕跡。到1990年,上海市境內个吳淞江共有27.6公里爲嚴重污染河段。全年大部分時期,河流呈現黑臭个情況,嚴重影響了上海个景觀搭市民生活。

蘇州河整治一期工程 编辑

1988年,時任上海市市長个朱鎔基確定整治蘇州河工程作爲市府个實事工程。1996年,經過多年个勘測、調研,上海市人民政府成立蘇州河環境綜合整治小組,確定“以水爲中心、全面規劃、遠近結合、突出重點、分步實施”个方針。1997年,蘇州河環境整治一期工程正式實施,河岸周圍个黃浦虹口靜安閘北四區拆遷沿河碼頭,並佈置沿河綠化,先行構造樣板地段。1998年,市政府擔沿河72家直接排汙單位个排污口封堵脫,迭歇也勒上游興建6條支流通往吳淞江个閘門。至2000年,蘇州河个黑臭污染情況開始扭轉[17]

一期工程完成後,蘇州河个惡臭狀況勒2002年左右基本消除,水質達到地表水V類个景觀水標準。其次勒2000年吳淞江污染頂重个斷面底泥中,發現昆蟲个幼蟲。2001年,市區段重現成群个小型魚類,同時濱河地區个綠化、公園、親水準台大幅增加,改善了蘇州河原先兩岸枯燥个市容景觀。

蘇州河整治二期工程 编辑

 
經過治理个蘇州河

2003年起,蘇州河整治進入二期工程階段,迭一階段分八個項目完成,分別爲:蘇州河河口水閘建設工程、蘇州河夢清園二期工程、蘇州河上游地區-黃渡鎮污水收集系統工程、蘇州河中下游水系截汙工程、蘇州河沿岸市政泵站雨天排江量削減工程、蘇州河兩岸綠化建設工程、市容環衛建設專案、西藏路橋改建工程。二期工程總投資40億元人民幣,勒2005年底前全部完成。

二期工程完成後,吳淞江中游个河濱環境得到改善。迭歇新建成功个蘇州河河口水閘个雙向擋水,形成完善个蘇州河綜合調水系統,蘇州河幹流、支流水質繼續穩步好轉。吳淞江全線截流封堵向蘇州河排汙个污染源達到594個,嘉定區南翔、江橋、黃渡段个河道污染狀況明顯緩解。根據2005年个水質監測資料,化學需氧量、生化需氧量達到地表水IV類標準。氨氮標準受上游个支流等影響,但上下游个情況基本持平[18]

蘇州河整治三期工程 编辑

2006年起,蘇州河開始進入大規模整治个壓末一個階段,三期工程。至2011年,三期工程進行到頂重要个疏浚底泥工程。三期工程主要分爲水系截汙治汙工程、長寧區環衛碼頭搬遷工程、青浦地區汙水處理廠配套管網工程和下游段防汛牆加固改造和底泥疏浚工程[19]

經濟 编辑

漁業 编辑

吳淞江自古作爲吳越重要个河流,太湖搭長江、東海个溝通管道,漁業資源豐富。吳淞江中頂有名个是爲松江鱸,迭種鱸魚出產於松江之中,故名。東晉時,吳人張季鷹勒洛陽城因見秋風起,想念起吳地蓴菜、松江鱸魚而辭官回鄉,即蓴鱸之思[20]

航運 编辑

 
乍浦路橋拍攝个,黃昏下頭个蘇州河

吳淞江勒元代以前,大型海上商船可經由此駛往蘇州府城。19世紀末20世紀初,蘇州河沿岸樹立大量內河小火輪碼頭,是當時上海个內河客運中心(十六鋪碼頭當時主要停靠海輪)。目前,吳淞江可由黃浦江內个上海港區駛入,沿河直達蘇州寶帶橋與京杭大運河相連。日常吳淞江水深低時一般勒拉2米以上,容百噸級船舶進入行駛。平常由於跨河橋樑、架空橋樑較多,加之市區段个橋樑普遍較低,個咾大潮來臨時,船舶航行能力也衹有百餘噸[21]

跨河橋樑 编辑

 
近處个爲四川路橋,遠處个爲乍浦路橋搭外白渡橋
  • 外白渡橋
  • 吳淞路閘橋(已拆脫)
  • 乍浦路橋
  • 四川路橋
  • 河南路橋
  • 山西路人行橋
  • 福建路橋
  • 浙江路橋
  • 西藏路橋
  • 烏鎮路橋
  • 新閘路人行橋
  • 成都路橋
  • 恒豐路橋
  • 普濟路橋
  • 長壽路橋
  • 昌化路橋
  • 江甯路橋
  • 西康路人行橋
  • 鎮坪路橋
  • 東新路橋(已拆脫)
  • 葉家宅路人行橋
  • 武甯路橋
  • 曹陽路橋
  • 白玉路橋(已拆脫)
  • 華東政法大學人行橋
  • 凱旋路橋
  • 中山北路橋
  • 華東師大人行橋
  • 古北路橋
  • 中江路橋(已拆脫)
  • 瀘定路橋
  • 真北路橋
  • 真光路橋
  • 祁連山南路橋
  • 雲嶺西路橋
  • S20跨蘇州河橋

人文 编辑

旅遊 编辑

蘇州河治理工程推進仔以後,吳淞江水質也好轉起來,吳淞江下游河段開始恢復遊船搭賽龍舟,吸引並促進旅遊產業。迭歇配合沿岸个歷史建築搭創意園區構成上海个一處旅遊平臺。

2000年,蘇州河一期工程收尾,水質明顯改善仔之後,蘇州河上賽龍舟个傳統民俗活動逐眼開始恢復起來。2003年10月下旬,由中國國家體育總局社會體育指導中心、上海市體育局、中國龍舟協會搭普陀區人民政府主辦个第一屆中國上海蘇州河城市龍舟國際邀請賽開槳。到2011年已辦到第八屆,還有得荷蘭比利時等國一淘參加[22]

2010年4月30日,上海世博會召開之前,吳淞江个普陀段開闢蘇州河水上遊覽,[23]在丹巴路碼頭至昌化路碼頭間往返運行,同年8月15日,增加仔夜間航行[24]

2020年底,勒拉上海中心城区个苏州河42公里岸线公共空间基本实现贯通开放。公共空间有绿地、道路景观搭亲水平台[25]

2021年3月14号,蘇州河42公里滨河空间当中个嘉定段基本完成,部分空間開始對外開放[26]

2021年12月23号夜头,苏州河静安段6.3公里长个南北沿岸景观灯光侪亮哉[27]

2022年1月18号,苏州河黄浦段个绿地灯光搭岸线灯光已经有蛮多哉[28]

2022年9月17号,苏州河旅游水上航线开通试运营[29]外滩源四行仓库昌化路长风公园四個码头首先投入试运营。丹巴路码头、中山公园码头、西康路码头搭梦清园码头也会得勒拉2022年年内交付[30]。12月15号,“悠游苏州河”水上航线正式投入试运营[31]

体育 编辑

上海赛艇公开赛从2021年开始,每年10月份会得勒拉苏州河上举行。当中,4.2公里项目个起点是普济路桥,500米项目个起点是河南路桥,伊拉个终点侪是外白渡桥附近个水域[32]

濱河優秀建築 编辑

吳淞江作爲上海頂重要个一條河流以及近代上海个見證,近邊優秀歷史建築眾多。譬方外白渡橋、四川路橋、乍浦路橋等橋樑建築,也有得俄羅斯聯邦駐滬總領事館、原英國駐滬總領事館等政治建築,還有得上海郵政總局、四行倉庫等文化歷史建築。頂有得代表性个是:

  • 外白渡橋
  • 俄羅斯聯邦駐上海總領事館
  • 上海大廈
  • 英國駐上海總領事館
  • 乍浦路橋
  • 光陸大樓
  • 上海郵政總局
  • 四川路橋
  • 河濱大樓
  • 上海總商會舊址
  • 四行倉庫
  • 福新麵粉廠
  • 上海造幣廠
  • 聖約翰大學舊址
  • 曹楊菜市場

參考文獻 编辑

  1. 松陵之名个由來. 東方網. 原始文档勒2020-08-18存档. 访问日脚2013-10-12.
  2. 2.0 2.1 2.2 2.3 上海水利志>>第一編水利自然環境>>第三章水域水系>>第二節陸域水系 (zh). 上海地方誌辦公室. 原始文档勒2013-10-14存档. 访问日脚2011-10-01.
  3. 上海租界志 >> 第四篇公共設備 >> 第三章市政 >> 第一節 市政管理 (zh). 上海市地方誌辦公室. 原始文档勒2015-08-03存档.
  4. 導言-蘇州河傳播曲 (zh). 東方網財經中心 (2011-07-04). 原始文档勒2020-08-18存档. 访问日脚2011-10-01.
  5. 地圖上從屬吳淞江蘇州河有望“正名” (zh). 新華網 (2004-11-11). 访问日脚2011-10-01.
  6. 吳淞江與吳淞口 (zh). 上海•浦東 (2009-08-05). 原始文档勒2011-10-29存档. 访问日脚2011-10-01.
  7. 清與濁——蘇州河:上海歷史个鏡子 (zh). 鳳凰讀書 (2010-08-17). 访问日脚2011-10-01.
  8. 第二十三卷水利>>第一章治水方略、工程負擔、投入>>第一節治水方略 (zh). 上海市地方誌辦公室. 原始文档勒2011-08-05存档. 访问日脚2011-10-01.
  9. 河流制導工程 (zh). 中國科學技術史--水利卷. 原始文档勒2005-03-17存档. 访问日脚2011-10-01.
  10. 歷代先賢:徐確 (zh). 莆田新聞網 (2008-09-23). 原始文档勒2016-03-04存档. 访问日脚2011-10-01.
  11. 區域農業史>太湖地區農業史>水利建設 (zh). 中華農業文明網. 访问日脚2011-10-01.[链接坏脱]
  12. “志丹苑”終展原貌 爲中國最大元代水利工程遺址(圖) (zh). 網易 (2006-11-18). 访问日脚2011-10-01.
  13. 從夏駕河到蘇州河 (zh). 中國昆山 (2009-02-18). 访问日脚2011-10-01.
  14. 夏元吉 (zh). 蘇州水網 (2007-10-25). 访问日脚2011-10-01.[链接坏脱]
  15. 海瑞疏浚吳淞江"故道"辨正--《海瑞治理吳淞江》一文商榷 (zh). 《上海地方誌》2005年第四期. 原始文档勒2012-05-14存档. 访问日脚2011-10-01.
  16. 16.0 16.1 蘇州河橋樑博物館 (zh). 新浪上海 (2009-04-11). 访问日脚2011-10-01.
  17. 蘇州河整治一期工程 (zh). 上海市水務局. 原始文档勒2020-05-22存档. 访问日脚2011-10-01.
  18. 蘇州河整治二期工程 (zh). 上海市水務局. 原始文档勒2022-03-30存档. 访问日脚2011-10-01.
  19. 蘇州河整治三期工程 (zh). 上海市水務局. 原始文档勒2020-05-22存档. 访问日脚2011-10-01.
  20. 松江鱸魚將“游”回餐桌 (zh). 搜狐新聞 (2006-10-10). 访问日脚2011-10-01.
  21. 上海內河航運志>>第一章航道>>第一節幹線及市區小港航道 (zh). 上海地方誌辦公室. 原始文档勒2015-10-27存档. 访问日脚2011-10-01.
  22. 上海舉行第六屆蘇州河城市龍舟賽 (zh). 騰訊網 (2009-05-29). 原始文档勒2020-09-30存档. 访问日脚2011-10-01.
  23. 蘇州河主打老少咸宜複合遊覽 (zh). 東方早報 (2010-08-24). 访问日脚2011-10-01.
  24. 蘇州河遊覽將現“百舸爭流” 遊船數量將從目前个8艘增至100艘(圖) (zh). 青年報上海 (2010-12-02). 访问日脚2011-10-01.
  25. "上海苏州河岸线公共空间贯通在即". Archived from the original on 2021-11-09. Retrieved 2020-12-21. 
  26. "苏州河中心城区42公里滨河空间嘉定段3月底全部对外开放". Archived from the original on 2021-11-09. Retrieved 2021-03-14. 
  27. "苏州河静安段6.3公里长南北沿岸景观灯光今晚全线亮灯". Retrieved 2021-12-24. 
  28. "苏州河黄浦段光影秀精彩纷呈". 
  29. "苏州河旅游水上航线今日开通试运营". 
  30. "苏州河旅游水上航线今试航:“你在船上看风景,岸上看你是风景”". 界面新聞. 
  31. "苏州河水上航线12月15日启动试运营,推出多种航线,60分钟航线100元/人". 
  32. "从“上马”到“上艇” 上海打造城市软实力“新名片”". Retrieved 2021-10-25. 

參見 编辑