通扬运河

通扬运河，顾名思义，通州搭扬州中央个条运河，古称运盐河，顶早勒拉公元前179-141年开始修建（西汉文帝、景帝）。来吴王刘濞个主持之下，沿仔春秋辰光吴王夫差开个邗沟开成个。主要用渠来运盐，全长212公里，一脚是用得来通江排水或者航运个。

历史

西汉辰光，今朝个如皋搭南通还是海，扬州过来个运河到海陵，便今朝个泰州市。
三国运河堵塞。
隋唐辰光，有通漕记载。
宋嘉佑(1056～1063年)，徐的调兵治泰州、海安咾啥场化个漕河，开通仔运出海盐三百万，“计得钱八百万缗”。归个辰光开始，用搿条运河运盐成为惯例。
熙宁辰光，王子京修运盐河，泰州到如皋170来里（参见如泰运河），后来再到南通出江。
明宣德辰光，白塔河置闸蓄水，乃么通扬运河个船只好经过白塔河入江，渡江到苏州搭仔江南各地。陈瑄进一步疏通白塔河，造新开、大桥、潘家、江口4闸，使得江南粮船孟渎河到白塔河，再经“通扬运河”到“湾头”，一脚到淮扬运河。实梗好弗经过瓜洲。
万历23年，杨一魁分黄导淮，开江都金湾河，造金湾减水三闸。
明末，江都造湾头闸、壁虎桥滚水坝搭凤凰桥滚水坝，分减淮扬运河。水经通扬运河归到芒稻河再流到江里向，通扬运河成为减水通路。
乾隆年间，金湾坝引河、东西湾坝引河、凤凰引河搭仔壁虎坝、湾头闸侪造好，通扬运河有得交关复杂个水流形势。航运搭泄水分开，芒稻河各水道好日长开勒浪，调度运行交关便当。
清代到民国辰光，通扬运河好几次修筑，保持通航一径到今朝。