金鲁贤

金鲁贤主教（Aloysius Jin Luxian；吳語：Cin Lu-yie；1916年6月20日—2013年4月27日），本名金鲁意，圣名类思。畀教廷認可為天主教上海教区助理主教，中国天主教愛國會認證為正權主教。

金魯賢主教牧徽

生平

1916年6月20号，金鲁贤生勒上海南市小东门方浜路邻德里，祖籍地勒浦东金家巷。1931年弗到14岁辰光父母双亡，成为孤儿。

自1932年起，金鲁贤开始修道，曾先后入读上海徐汇神学院搭献县耶稣会神学院，1938年入耶稣会，1945年5月19号勒上海晋铎。1946年畀派往苏北东台、淮阴（清江浦）任本堂神父。1947年赴法国里昂附近个巴莱慕尼亚（Paray-le-Monial），完成耶稣会卒试，成为正式会士。1948年至1950年就读于意大利罗马宗座额我略大学。假期去德国科隆、奥地利因斯布鲁克等地学习德语。1950年获罗马宗座额我略大学神学博士学位。

1951年，金鲁贤回到中国。黎培里总主教畀驱逐出境前，任命伊为徐汇修院个代院长。6月5日格寿平被捕后，继任海州监牧区代宗座监牧，又畀巡阅使蒲敏道任命为耶稣会上海区代会长。8月，蒲敏道畀驱逐出境，金鲁贤又继任耶稣会中华会省代巡阅使。

1955年9月8号夜裏，中共政府对天主教上海教区采取镇压行动（在中国天主教内被称为“九八教难”），时任上海教区主教、苏州及南京总教区宗座代办龚品梅主教（后为教宗若望·保禄二世擢升为枢机主教）搭包括金鲁贤在内个一大批神父同时以反革命罪名被捕入狱。1960年，金鲁贤畀判处有期徒刑18年。

金鲁贤勒牢监裏向蹲了18年，又接受劳改9年，勒北方从事翻译工作。1982年获释,任佘山修院院长。1985年1月27号，金鲁贤由周村教区宗怀德主礼、汉口教区董光清搭南京教区钱惠民襄礼祝圣为上海教区助理主教，为中国天主教爱国会所承认，但朆得到教宗个任命搭批准。交伊同时祝圣个还有李思德。1988年，张家树殁脱以后，金鲁贤接替仔张家树个位置。1989年，信徒勒弥撒当中恢复为教宗祈祷。2004年，伊向罗马教廷请求宽恕，获得搭罗马教宗个共融，畀教廷认可为上海教区个助理主教，乃末伊是教廷搭北京政府侪承认个主教。但非官方教会对金鲁贤邪气反感，主要原因还是伊勒“九八教难”辰光“叛教”。

教廷只承认金鲁贤是上海教区助理主教，而上海教区个正权主教则是未获中国政府承认、外加常年受到监视个地下教会主教范忠良，伊曾经勒青海坟场背仔三十年个尸体，于2000年接续龚品梅，担任上海教区正权主教并署理南京总教区总主教，并且是地下个天主教中国大陆主教团团长。

勒金鲁贤主教带领下，上海教区成为中国大陆顶活跃个官方教区之一，官方统计个天主教徒人数已达15万。1982年，金主教勒上海率先重新恢复修道院。勒1985年启用个佘山修院也是全国最先进个修道院。伊勒保护教会财产方面做出仔弗小个贡献，上海教区收回了大量勒“文革”期间畀占用个教产。近年来，随仔国内房地产市场个节节攀高，坐拥大量房产个上海教区也因此成为中国内地拥有财富最多个教区，弗单能自给自养，还能帮助其他教区。上海教区也成立了专门个社会服务中心——光启社会服务中心来帮助伊排处于贫苦中个教区搭个人。但迭歇，金鲁贤助理主教勒神职人员个灵修培养以及管理方面，却颇为失意。勒2009年其撰写个司铎年牧函中，即承认廿年以来上海教区（地上）“后悔领受铎品而还俗个有11人之多，占教区神父个八分之一”，金认为箇是一个“令人痛心个数字”。作兴是因为迭个原因，勒2009年下半年，金鲁贤主教再次擔邢文之辅理主教任命为上海佘山修院院长，以接替前任院长方祖耀神父，希望以邢文之辅理主教个严谨作风搭为教友所崇敬个圣德来整顿修院。

金鲁贤能够讲多种欧洲语言，曾经会见交关中国教会个海外神长、国外关心人权搭宗教自由个人士，如：陈日君枢机主教、谷寒松神父、美国总统克林顿、德国总理默克尔等。

2005年6月28号，89岁个金鲁贤主教勒徐家汇圣依纳爵主教座堂祝圣42岁个邢文之为上海教区辅理主教，外界有评论认为邢文之辅理主教将成为其继任者。天主教香港教区主教陈日君称邢文之是先教宗若望·保禄二世临终前任命个，伊也是教廷搭北京政府都承认的主教。邢文之辅理主教晋牧典礼当天，本来应该当众宣读教宗个任命状，但受到当局个恐吓，迭樁事体最终作罢，让人感到邪气遗憾。邢文之辅理主教对此也非常不满，曾话歇：“按照我个脾气，我是肯定要读个。我个人是无所谓个，但我们个教会还必须要有明天……。”有评价说，邢辅理主教个任命，将结束中国大陆顶活跃个教区之一——上海教区个分裂状态。

2005年9月，梵蒂冈宣布邀请金鲁贤、李笃安（天主教西安总教区总主教）、李镜峰（天主教凤翔教区主教）、魏景仪（天主教齐齐哈尔教区主教）等4位中国主教参加勒罗马开幕个世界主教会议，但是后首来4人侪未能成行。

2006年5月23号，德国总理默克尔会见金鲁贤主教并参观徐家汇主教座堂，金鲁贤用德语当场回头脱默克尔关于由德方援助复建毁勒“文革”个徐汇大堂管风琴个提议。

2007年，上海辞书出版社为金鲁贤出版了《金鲁贤文集》一书，箇是记录仔80年代至90年代间个部分牧函，以及金鲁贤主教勒罗马宗座额我略大学攻读神学博士辰光个博士论文咾啥。还有一眼是金鲁贤主教对待当时教会所面临个相关问题个看法交建议。

2009年，金鲁贤出版了其自传《绝处逢生·上》，该书记载了金鲁贤早年个生活经历，以及1950年代回国后个种种遭遇，颇具史料价值。金鲁贤主教勒书裏向为自家个行为做出仔交关主观性个辩护，其真实性还待多方验证。该书勒出辰光一波三折，遭到宗教主管当局个严格审查，墨家嘸沒能获得出版许可，显示宗教主管当局对其身份地位之重视，但金鲁贤助理主教仍旧少量印刷以赠友人。

生于1916年个金鲁贤主教，年逾93岁却依然弗退休，箇已经违反了《天主教法典》中主教应75岁退休之规定。批评者认为其恋栈权力，与香港教区个陈日君枢机勒75岁之后主动请辞形成鲜明对比。但也有支持者认为，金鲁贤主教勒国内外威望极高，拥有极其广泛个人脉关系。面对复杂多变个中国天主教界形势，需要有人能妥善地处理好与搭中国政府个关系以及搭梵蒂冈的关系，具备高超个外交手段个金鲁贤主教在位，是有利于教会个进一步发展。

2013年4月27号，金鲁贤主教因胰腺癌勒上海瑞金医院逝世，享年96歲。8月19号，依据金主教“葬礼从简、骨灰海葬”个遗嘱，上海教区举行金鲁贤主教骨灰海葬礼。早浪7时整，勒主教府小圣堂举行起灵礼。7时30分，驱车前往上海吴淞码头。9时轮船起航。9时15分，举行骨灰洒海礼，由神父、修女、教友及主教亲属等各代表擔主教骨灰洒入大海。上半日10时，主教骨灰海葬礼结束全体返航。当日下半日14时整，勒上海教区主教座堂——徐家汇圣依纳爵主教座堂举行金主教追思弥撒。之后，举行了主教遗物安放礼，擔主教生前常用物件、圣物安放勒拉教堂内个追思间。