上海地铁车票与票价

上海地铁自1993年开通试运营以来，票价体系经过多趟调整，也有多种车票。

上海地铁验票闸机

票价体系历史

一票通启用前

1993年4月份到2000年8月份

一号线

• 1993年4月份，新龙华站-徐家汇站对民众开通观光试运行，票价5块（人民币，下同）。
• 1993年12月份，徐家汇站-上海火车站站对民众开通观光试运行，票价4块。
• 1995年4月份，上海火车站站-锦江乐园站正式投入运行，核定票价2、4、6块，必过实际执行1、2、3块个优惠票价。上海地铁公司曾计划来勒当年年底恢复2、4、6块票价，必过呒办法实现。
• 1995年12月份，全线改成2块单一票价。
• 1996年12月份，南段（锦江乐园站-莘庄站）独立运行，票价1块。
• 1997年7月份，全线（上海火车站站-莘庄站），票价是乘坐13站及以内（包括上车站）2块，13站以上3块。
• 1999年3月份，1号线取消纸质车票，启用自动检票系统，票价涨价1块，也就是乘坐13站以内（含，包括上车站）3块，13站以上4块。

二号线

• 1999年9月份，2号线造好试通车，发售观光票，票价5块。
• 2000年，二号线观光票实行买一赠一政策，票价还是5块。
• 2000年5月份，二号线正式投入运营，采取磁卡车票搭储值卡，实行6公里以内2块，6-16公里3块，16公里以上4块个多级票价。

2000年8月份至2005年12月份

一、二号线

• 2000年8月份，一、二号线正式联网，采取统一票价，乘客来勒人民广场站弗需要出站换乘，票价标准是6公里以内2块，6-16公里3块，16公里以上每6公里加1块。为咾鼓励乘客乘二号线过江，2号线乘坐两站以内票价1块，过江坐3站以内是1块，莘庄站到人民广场站虽然已超16公里，还是算3块。
• 2001年，推广上海公共交通卡，地铁公司自行发行个储值卡停用。
• 2005年9月份，上海地铁对票价标准进行调整，1块搭2块个票价取消，新票价标准是0-6公里3块（5号线单线里向0-6公里2块），6公里以上每10公里增加1块。

三号线

• 2000年，3号线投入试运营，使用纸质车票，9站以内2块，9站以上3块。
• 2003年，三号线启用磁卡车票，票价改成6公里以内2块，6-16公里3块，16公里以上每6公里增加1块。
• 2005年9月份，票价标准调整是0-6公里3块，6公里以上每10公里增加1块。

五号线

• 2003年，5号线投入试运营，使用纸质车票，票价是6公里以内2块，6公里以上3块。

一票通启用以后

• 2005年底，“一票通”启用，市区线路票价标准执行至今（22号线除外）。
• 2024年9月份，上海市发改委邀请代表参与审议《上海市轨道交通市域线票价机制方案》。11月份，公布《关于上海市轨道交通市域线票价机制有关事项的通知》（沪发改价调〔2024〕54号，简称“54号文”），适用2024年及以后开通个，由申通地铁集团运营个市域线（包括市域铁路、轨道快线（包括22号线））。

票价标准

市区线路

根据《关于同意调整本市轨道交通客运票价个批复》（沪交财[2005]527号），上海地铁市区线路票价标准按乘坐距离计算：0-6公里收3块，6-16公里收4块，16-26公里收5块，以后每10公里加1块，上弗封顶，任意两站间票价按最短路径计算。到2024年12月份，上海地铁全线路网最高票价是15块（对应路线是17号线西岑站来往16号线滴水湖站）。

2003年11月25号到2020年12月25号，乘客假使只乘5号线莘庄—东川路—闵行开发区段，起步票价2块。2020年12月26号开始，5号线既有段恢复全网络统一票价。

特殊情况：为咾防止地铁里向人忒多，按照《上海市轨道交通乘客守则》第三条第（二）点规定，目前进站到出站辰光超过4個钟头，会得加收3块超时费。

市域线路（含地铁22号线）

根据上海市发展和改革委员会、上海市交通委员会《关于上海市轨道交通市域线票价机制有关事项个通知》（沪发改价调〔2024〕54号，以下简称“54号文”），2024年及以后开通个，由申通地铁集团运营个市域线（包含市域铁路、轨道快线（含地铁22号线）），适用更高个费率：

• 设计最高时速160公里及以上个市域线，每人公里基准费率0.45元；
• 设计最高时速160公里以下个市域线，每人公里基准费率0.37元；
• 每人次起步价4块；
• 假使乘客来勒市区线路搭市域线（含轨道快线）之间换乘，市区线路票价搭市域线（含轨道快线）票价直接累加。

磁浮

上海磁浮示范运营线由申通地铁下属子公司上海磁浮发展公司运营，实行单一票价，单独买单程票要50块，一次性买往返票（7天里向有效）是80块；用交通卡或持有当天机票好享受单程40块个优惠价钿。另外，来勒指定车站亦有磁浮地铁一票通，55块（单程磁浮+地铁一日票）或85块（双程磁浮+地铁一日票）。

售票方式

除开春运或者有展会个情况会得提供人工卖票，上海地铁只有自动售票机。买票个辰光，根据自动售票机提示买。部分售票机只支持现金甚至只收铅角子，部分支持支付宝、微信支付、云闪付、各大银行手机银行客户端付钞票。2018年11月1号，上海火车站站、上海南站站、虹桥火车站站、虹桥1号航站楼站、虹桥2号航站楼站、浦东国际机场站、南京东路站个售票机首先支持扫码购票。2020年1月1号开始，所有车站个售票机侪支持箇些付款方式。

2016年10月31号，上海地铁来勒2号线陆家嘴站、11号线迪士尼站帮10号线南京东路站试运行云购票服务，使用支付宝或付费通客户端实现在线支付买票，提供扫码取票或机上买票两种方式，好买单程票、一日票、三日票。

2018年11月1号，迎接首届中国国际进口博览会召开，上海地铁来勒上海火车站站、上海南站站、虹桥火车站站、虹桥1号航站楼站、虹桥2号航站楼站、浦东国际机场站提供语音选站买票功能。2023年6月1号开始，人民广场站试点启用5台“多功能售票机”，卖“纸质二维码单程票”，2024年开始新开通箇站头侪是箇种售票机。

票种

常规票种

单程票

车站卖个当天单程票卡，来勒发售当天来勒卖票车站进站乘车，出站插进闸机里向回收。出站个辰光，车钿要小于等于车票额定个钞票，弗然要去服务中心补钞票。2020年第三届中国国际进口博览会期间，上海地铁来勒2号线虹桥火车站站、徐泾东站、17号线诸光路站试行电子单程票，通过微信、支付宝个“上海地铁官方购票”小程序直接买二维码电子单程票，刷码进出站。

2023年6月1号开始，人民广场站试点启用5台“多功能售票机”，乘客来勒设备浪扫码买“纸质二维码单程票”。帮传统单程票弗意义，“纸质二维码单程票”出站弗回收，“照进照出”，乘客好自家带回去。2024年开始开通个新车站侪采用新个纸质车票。

单程票弗好虚拟换乘，来勒出站换乘车站换乘要重新买票。

乘车二维码

乘客来勒手机上下载Metro大都会客户端来乘上海地铁，微信、支付宝、高德地图、随申行、随申办等个上海公共交通二维码亦好乘上海地铁。闸机扫码进出站，车钿帮单程票意义，必过虚拟换乘好连续计钞票。

早期二维码扫描区只有部分闸机有。2018年9月中旬，上海地铁完成全部闸机改造，所有闸机侪支持二维码扫码乘地铁。配合长三角一体化建设，2018年12月1号开始，上海地铁、杭州地铁、宁波轨道交通实现官方客户端乘车二维码互联互通。2019年4月15号，乘车二维码互联互通网络成员新增温州轨道交通；4月19号加了只合肥轨道交通。5月22号，南京地铁、苏州轨道交通成为乘车二维码互联互通网络新成员。2019年7月份，青岛地铁帮上海地铁实现乘车码互通，是长三角以外城市头一埭实现地铁乘车码互通。同年8月7号，无锡地铁“码上行”、厦门“享出行”帮上海地铁乘车码互通。同年12月份，徐州地铁客户端帮上海地铁乘车码互通，年底前常州地铁、兰州轨道交通也帮上海地铁实现乘车码互通。2020年12月1号开始，北京地铁“亿通行”好刷码乘上海地铁。2021年3月5号开始，“广州地铁APP”好刷码乘上海地铁。2021年4月22号开始，重庆轨道交通“渝畅行”好刷码乘上海地铁。

使用Metro大都会个二维码乘地铁，要打开手机个蓝牙功能才好进出站。乘客亦可使用Metro大都会买一日票、三日票。Metro大都会乘车二维码（除开一日票、三日票）好享受虚拟换乘优惠搭仔自然月里向消费满70块个九折优惠，必过没换乘优惠。

2022年疫情里向，Metro大都会客户端二维码增加健康码帮核酸检测信息展示功能。2022年7月15号，Metro大都会客户端开通数字人民币支付功能。9月28号，上海地铁支持使用微信、支付宝刷码乘车，侪集成健康码、场所码、乘车码个功能。

2022年12月3号，随申码、乘车码实现对上海公交、地铁、轮渡个全覆盖，乘客好使用随申行、随申办、上海交通卡、微信、支付宝、高德地图等个随申码、乘车码，弗用开蓝牙就好刷上海轨道交通（含磁悬浮）、地面公交、摆渡等交通工具，享受换乘优惠。

上海公共交通卡

持有上海公共交通卡（含实体卡、虚拟卡）个乘客好享受虚拟换乘优惠帮自然月里向乘上海地铁实际累积消费满70块个优惠。

上海公共交通卡个实体卡好来勒各站个CVM充值机（非售票机）进行办理、充值、圈存。部分型号智能手机个用户好通过内置个应用程序或上海交通卡APP自助开通虚拟交通卡乘地铁（需要开启手机NFC功能），优惠政策帮实体卡一式一样个。

异地卡

部分外省市公交卡（住建部City Union标准）好来勒上海地铁乘车，享受虚拟换乘连续计费，没换乘优惠。2020年1月1号开始，持交通联合卡个乘客好乘坐上海地铁（含手机NFC卡）。

保通卡

保通卡是中国太平洋保险推出个纯商业保险产品，每个号头要去交保费个，2016年7月1号开始使用。帮敬老卡一样，上海市户籍70岁以上个老年人凭卡来勒非高峰好无限次乘上海公共交通，除开行驶高速公路线路（实行“一人一座”、弗允许乘客立勒）、机场线、旅游线、磁浮线。

特别票种

• 纪念票卡：来勒有效期里向好随便乘上海地铁，路程弗限，趟数弗限，照进照出，出站弗回收。
• 赠票卡：来勒有效期里向好随便乘上海地铁，路程弗限，趟数弗限，照进照出，出站弗回收。
• 票务处理专用票：车票发生故障个辰光用来调张车票。

免费乘车政策

残疾军人凭本人《中华人民共和国残疾军人证》，离休干部凭本人《中华人民共和国老干部离休荣誉证》或者《中国人民解放军离休干部荣誉证》、盲人凭本人《上海市盲人证》、革命烈士家属凭本人《上海市革命烈士家属优待证》、伤残警察凭《中华人民共和国伤残人民警察证》，好免费乘地铁；乘客好免费带一名身高1.3米（含1.3米）以下个小囡乘车，超过一名个按超过人数买票。没成年人带个学龄前儿童弗好单独乘地铁。

历史票种

• 社会保障卡—敬老卡：上海市户籍70岁以上老人凭IC敬老卡好来勒非高峰个辰光无数趟乘上海公共交通，包括地铁、公共汽车、轮渡咾啥个。2016年6月26号开始，社会保障卡—敬老卡免费乘坐地铁制度停脱哉，70岁以上长者要另外买票或去刷保通卡。

车票图样

• 
  1990年代上海地铁手撕票，当时只有一号线上海火车站至莘庄16个站点
• 
  1995年一号线使用个定额车票
• 
  1995－1997年间一号线使用个车票
• 
  1997－1999年间一号线使用个车票
• 
  3号线2003年前使用个车票
• 
  5号线2005年前使用个车票

优惠

2005年12月25号开始，上海地铁实行一票通个全路网计价模式，按照进出两站间最短换乘里程收钞票。

虚拟换乘

2008年6月1号开始，持上海公共交通卡个乘客来勒虚拟换乘站好来勒30分钟里向出站换乘，里程连续计算。一日票、三日票乘客因为弗算路程搭票价，也好箇能换乘。用手机appMetro大都会个乘客，亦好享受虚拟换乘优惠。

用单程票个乘客来勒箇只方法来勒虚拟换乘站换乘还是要重新买票，里程弗累计，必过只要弗出站换乘，票价还是按照里程最短路径计算。

折扣

每個自然月里向用同一张上海公共交通卡、同一只Metro大都会账号或同一渠道同一账号个上海公共交通乘车码乘上海地铁实际累积消费满70块，箇只号头里向，满70块个箇笔搭挺下来个消费侪打九折，第二个号头重置。

公交地铁换乘优惠

用公交卡（包括虚拟公交卡）个乘客，来勒公交消费以后120分钟里向乘地铁，或来勒地铁出站以后120分钟里向来勒公交高头消费侪好优惠1块。必过地铁出站以后再乘地铁没办法享受换乘优惠（虚拟换乘个连续计价弗受影响）。用外地交通卡或者外地地铁官方客户端乘上海地铁个没箇只优惠。

因为Metro大都会APP只好来勒地铁浪涌，故咾也呒办法享受箇只优惠。2022年12月3号，随申码、上海公共交通卡乘车码实现对上海公交、地铁、轮渡个全覆盖，乘客使用同一随申码、上海公共交通卡乘车码乘车好享受公交帮轨道交通（不含磁悬浮）间个换乘优惠。

优惠措施沿革

保通卡闸机通道

除开针对革命伤残军人、盲人等个优惠措施，上海轨道交通对普通民众个优惠措施大致有下头箇些变化。

• 2003年，5号线投入试运营，票价6公里以内2块，6公里以上3块。必过5号线东川路站到奉贤新城站开通以后并没扩展优惠范围，箇只折扣还来勒2020年12月26号取消哉。
• 2000年开始，莘庄站到人民广场站虽然已超过16公里，还是算进6-16公里档次里向，实行3块票价；后来实施一票通制度，涨价一块，执行票价变成4块哉。
• 2005年11月份，上海轨道交通启用连乘优惠，乘客来勒一只自然月里向，用同一张公交卡乘坐轨道交通满70块，箇只号头挺下来箇部分乘轨道交通好享受9折优惠。
• 2007年10月份，上海轨道交通增加换乘优惠，轨道交通换乘空调公交或反之好享受1块优惠，好帮9折个连乘优惠叠加：先叠加换乘优惠，在打9折连乘折扣。
• 2008年6月份，上海轨道交通宜山路站、上海火车站站、虹口足球场站三個换乘站，实施虚拟换乘，用公交卡好来勒出站以后半個钟头里向零换乘，票价连续计算。後些来对于部分客流忒多个换乘站也有出站换乘个措施，比方讲龙阳路站。宜山路站、虹口足球场站、徐家汇站、陕西南路站、龙华站等车站已取消曾实施过个虚拟换乘，现在还有个虚拟换乘站有上海火车站站、虹桥二号航站楼站、南京西路站、长清路站、娄山关路站、曹杨路站等。
• 2009年4月份，上海公共交通换乘优惠网络扩大，轨道交通、空调公交、非空调公交相互换乘侪享受1块个换乘优惠，换乘辰光延长到2個钟头。
• 2016年6月26号开始，社会保障卡—敬老卡免费乘地鐵制度停止实行，70岁以上长者要自家另外买票或刷卡乘坐。2016年7月1号开始，中国太平洋保险推出保通卡，上海市户籍70岁以上个老年人凭卡来勒非高峰时段好无限次乘坐轨道交通线路。

参考资料

文献

• 上海地方志：市政基础设施建设档案，存勒互联网档案馆当中。（2020年7月23号）
• 论坛文章：上海早期个地铁纸票^{[链接坏脱]}
• 收藏家族成员：上海地铁卡^{[链接坏脱]}
• 上海地铁二号线今天中午通车档案，存勒互联网档案馆当中。（2018年3月28号）
• 上海地铁二号线一期工程试通车档案，存勒互联网档案馆当中。（2020年2月1号）
• 两条线一票乘
• 公共交通卡一卡通地铁档案，存勒互联网档案馆当中。（2020年2月1号）
• 世纪大道站今重启^{[链接坏脱]}
• 上海持交通卡坐地铁有优惠档案，存勒互联网档案馆当中。（2016年3月4号）
• 上海轨交一、二、三线今起调价^{[链接坏脱]}
• 上海地铁官网票价查询档案，存勒互联网档案馆当中。（2018年8月19号）