查理五世（神圣罗马帝国）
（从卡洛斯一世 (西班牙)转戳到箇里）
神圣罗马帝国皇帝查理五世（德文：Karl V, Römisch-deutscher Kaiser，1500年2月24号-1558年9月21号），即西班牙国王卡洛斯一世（西班牙文：Carlos I de España）。伊是哈布斯堡家族个成员，出生垃低地地区佛冷代国个根特。通过伊爷爷搭爸爸个关系，伊继承仔奥地利、勃艮第、卡斯蒂亚、阿拉贡个所有领土，并立在神圣罗马帝国个选帝会议高头，通过走关系，当选神圣罗马帝国皇帝。个能，伊立在30岁个辰光，就拿整个西欧大部分地区侪控制牢哉（立在亚平宁半岛还拥有米兰、那不勒斯领地）。加上个辰光西班牙征服者开始征服美洲，所以，伊也就成为整个基督教世界顶顶有权力搭荣耀个君主。弗过，这也带来蛮多麻烦个事体，法国国王法郎西斯一世一直立在对伊寻麻烦，东面个奥斯曼帝国也一直对欧洲侵略扩张，这侪分散伊蛮多精力，要去对付法国人搭穆斯林。弗过，顶顶让伊头疼个，是神圣罗马帝国境内个宗教改革事体，因为马丁路德个煽动搭交关诸侯叛变，让老早就弗大稳定个帝国，更加内部矛盾增加。1556年，伊拿自家西班牙国王个位置让把自家个大儿子费利佩二世 (西班牙)。1558年死脱之后，拿神圣罗马帝国搭自家个奥地利领土，让自家阿弟斐迪南一世继承。伊个母语是法文；欢喜西班牙文，讲西班牙文是搭天主交谈个语言。伊弗大欢喜德文，讲德文适合搭马槽当中个牲口对话。
