叉袋角

叉袋角，也有叫沙袋角个，是上海市市区一个片区名，勒拉静安区北部海防路、淮安路搭西苏州路交会处一带搭仔普陀区莫干山路附近箇搭。

叉袋角区片图，叉袋角本身就是勒拉图右上角个河浜个弯。

莫干山路东许河浜边上向，后歇来侪是工厂，叉袋角箇个地名也逐渐消失，必过安远路南面也有用箇只地名个。

名称由来

箇个地方为啥叫“叉袋角”现在还呒没只公认个讲法。

《上海地名志》认为，箇面个苏州河样子凸出仔，像叉袋箇种农用家私一样，个咾叫箇个名字。

必过《普陀地名志》认为是箇能介个：阜丰面粉厂造好以后，工人每天侪搭面粉袋、袋装面粉接触，两角叉开，像河浜打弯只角，乃么拿“沙袋角”改成“叉袋角”。

地理

箇面个吴淞江弯仔两只弯，分别有90度搭60度，北面只弯是凸出仔个三角半岛，南面只弯是凹进去个弯。

西岸

1896年，孙多森、孙多鑫勒拉叉袋角造仔阜丰面粉厂，箇是中国头一爿机器制粉厂。1912年，无锡个荣家二兄弟荣宗敬、荣德生也勒拉边上向造仔福新面粉厂。箇二座厂后歇来合并成阜丰福新面粉厂，也就是公私合营以后个上海面粉厂。现在面粉厂算文物登记。

抗日战争一开始，租界还呒没畀日本占脱，吴淞江是天然个界浜。1937年10月26号，日军飞机厾炸弹厾花脱仔，落拉叉袋角西安，炸脱一部十六路某号有轨电车，死仔交关乘客，车子也烧脱哉。

东岸

• 闸北
• 三层楼

摆渡

箇面曾经有摆渡，叫通济路船渡（1927年前叫叉袋角义渡），南岸位于西苏州河路217号，北岸为光复西路1231号（通济路口）。

1956年5月1号，伊畀并进上海摆渡。阿末勒拉1984年，因为造防汛墙而停脱撤销脱。