杨树浦水厂

上海自来水公司杨树浦水厂，老底子叫英商杨树浦水厂，简称杨树浦水厂，垃拉中国上海市杨浦区杨树浦路830号，是上海市最早建立个自来水厂之一。箇水厂始建于清同治十三年（1875年），最早由立德洋行出资修建搭维护，但由于未能得到租界工部局个支持而只能用船舶搭水车供水。光绪七年（1883年）到光绪九年（1885年），箇水厂交割畀英商上海自来水公司，光绪九年重建完成，设有供水线路，保留船舶供水业务。抗日战争个辰光，箇水厂一度畀日军接管，交畀日本经营个华中水电公司管理。抗日战争结束以后，水厂还畀英商上海自来水公司。中华人民共和国成立后，1952年，上海市人民政府接收水厂並正式改成现在箇只名字。2013年，杨树浦水厂成为全国重点文物保护单位。

杨树浦水厂

杨树浦水厂
全国重点文物保护单位 中华人民共和国国务院公布
所在	上海市杨浦区
分类	近代建筑
时代	1883年
编号	7-1694-5-087
登录	2013年3月

历史

清朝时期

19世纪60年代中后期，上海公共租界工部局开始造供水系统。同治九年（1871年）对黄浦江个水质进行取样检测，提出来勒黄浦江个龙华附近、凤凰山附近或者杨树浦港附近挑一只地方建立取水点个方案。同治十年（1872年），工部局表示成本忒高哉，否决工部局工程师提出个所有方案。清同治十三年（1875年），立德洋行创办，来勒现在杨树浦水厂南区经营一家水厂，是杨树浦水厂个前身，占地115亩，有沉淀池、过滤池等净水设施，总投资白银拢共30000两，必过迟迟得弗到租界当局个支持，呒办法造输水管道，只好用木船拿水摇到外滩去，再分装到水车向租界里向个居民卖水。水厂还向黄浦江港里向个船供水。箇能介经营方式造成水价贵唻只有少数居民喫得起。光绪六年（1880年），立德洋行关停箇家水厂。

1879年，英国来勒上海个商人麦克利沃特向工部局提出申请，准备组织家股份公司承建上海自来水系统，随即来勒伦敦组建上海自来水公司筹备委员会，由箇家筹备委员会上海委员会具体负责筹建事宜。1880年1月24号，委员会正式向工部局提出方案，取黄浦江下游水造水厂供应租界，得到工部局个同意。11月2号，上海自来水股份有限公司来勒伦敦成立。清朝光绪七年（1881年）六月份，英商上海自来水公司收购水厂个动产部分，叫伊英商上海自来水公司水厂，不动产部分来勒光绪九年（1883年）七月完成交割，共计花脱白银18000两。水厂来勒光绪七年（1881年）正式开始改造，主要设备搭仔管道材料由英国制造，设计能力达到日供水量6818立方米，总耗资12万英镑。水厂初期占地7.39万平方米，生产流程是潮汐进水，慢滤池过滤，蒸汽出水，取水点就设勒水厂边浪，黄浦江下游。光绪九年（1883年）五月，水厂竣工，是上海市最早使用水泥搭混凝土个工业建筑。光绪九年六月廿九（8月1号），水厂正式开始供水，两江总督李鸿章出席开闸仪式。伊向当时个公共租界、法租界，静安寺以东个越界筑路地区供水，用水人口约17万人，负担一部分市政用水，後些来弗断扩大供水区域。水厂刚刚重建完成个辰光，水厂主要设备有2座总容量约合2.79万立方米个间歇式自然沉淀池，4座慢滤池，1座清水池，3台蒸汽锅炉搭仔1座出水间，弗少是蒸汽驱动个。水厂还来勒香港路造有1座总容量682立方米个水塔。一开始，水厂用蒸汽水泵机个柱塞容量搭机器往复转数来计算出厂水量，后来改用毕托管或水泵个出厂管上装置文丘里流量计来计量。水厂投入使用个第一年，总出水量达到55.6万立方米，平均每天出水量3698立方米。水厂还保留原有个船舶供水业务，配备5艘船舶给水船，每艘水船员工5人，员工轮班，保证24小时供水。船舶打电话畀英商自来水公司给水部，或者来勒船上挂浪红底黄十字旗（R旗），就好要求水厂供水。

水厂刚造好个辰光，采用工头招工个方式招聘长工，工头收介绍费，长工帮企业之间是直接聘用关系。工头还负责水厂个短工招聘。水厂每天要用200名左右个短工。短工每天要来勒太阳出来前赶到厂门口排队领工牌，拿着工牌才好安排接下来一天个生活。工头则会得拿着鸡毛帚乱打乱敲，短工为咾领到块牌会得畀打得唻血淋哒滴个。工头还会得专门拿工牌留畀“送礼”个短工，送礼送唻少个一周也只好做4天工，短工们弗得弗凑钞票送礼，请厂里个长工作担保。短工个雇佣一般每期弗超过3只号头，工资当天结算，比长工少交关，还呒没休息天，更没升职、年奖咾啥个待遇。

光绪十三年（1887年），水厂平均每天供水量达到7740立方米，光绪廿二年（1896年）超过1万立方米。光绪廿八年（1902年）初，法租界公董局水厂设立董家渡水厂。杨树浦水厂对法租界个供水量逐渐减少，当年2月1号完全切断供应。光绪三十三年（1907年），新闸路造了座水塔，总容量865立方米。宣统二年（1910年），水厂为咾降低运转成本，自家安装煤气发生器。宣统三年（1911年），水厂净水设备增加沉淀池搭仔慢滤池，水厂占地扩到14.05万平方米。

中华民国时期

1915年，杨树浦水厂第一台电动离心水泵投入运行，电动水泵机逐渐取代蒸汽水泵机。1921年，主要净水设备慢滤池增加到39座，平均每天供水量超过10万立方米。1922年，胶州路造了座水库水泵站，容量4.7万立方米，做试验性生产。1923年，水厂成功试验加注硫酸铝连续沉淀工艺，改用连续沉淀代替间歇沉淀，用美式快滤池逐步代替英式慢滤池。箇段辰光，水厂主要净水设施有7座沉淀池，3组快滤池（24格），26座慢滤池，5座清水池。1926年，水厂里向个煤气水泵机逐步替代成柴油水泵机；1928年，水厂由公和洋行设计造出3号引擎车间。1937年11月份，英商杨树浦水厂发文停止工头招工，改成水厂直接招工。20世纪30年代末，水厂每天供水能力有40万立方米，水厂占地扩大到25.7万平方米，是远东第一大水厂。

抗日战争个辰光，水厂个送水船曾经到佘山一艘抛脱个轮船上送水，是1949年之前杨树浦水厂送水船跑过最远个地方。。1941年，太平洋战争爆发，水厂畀日军接管，改由日本人个华中水电公司经营，水厂平均每天供水量一路降到17.43万立方米。抗日战争胜利以后，1945年，上海市政府接收水厂，1946年5月交还畀英商经营。1949年，水厂平均每天供水量27.14万立方米，最大日供水量31.46万立方米，生产能力是日供水量41万立方米。水厂主要功能性建筑物有：3座取水构筑物，其中1座江心式，2座岸边式；1座一级泵房，泵房里向配备4台柴油水泵机组，3台电动水泵机组，每天总取水能力80万立方米；7座混凝沉淀池（6座砖结构，1座混凝土结构），总容积9万立方米；24座慢滤池（砖结构），滤水面积共3.71万平方米；3座快滤池（混凝土结构），滤水面积共3196平方米；1座洗砂水塔，容积728立方米；5座清水池（2座砖结构，3座混凝土结构），总容积为1.64万立方米；1整套加矾、加氢设备搭仔辅助设施；3座二级泵房（砖结构），配备共计12台个各式各样个水泵机组（蒸汽、柴油、电动等），每天总出水能力约64万立方米。

中华人民共和国时期

中华人民共和国成立以后，1952年，英商上海自来水公司畀上海市人民政府征收脱，水厂改名上海自来水公司杨树浦水厂，简称杨树浦水厂。1952年到1955年，上海市政府拿包括杨树浦水厂个全市水厂连勒一道，新铺设供水管网，解决全市供水弗均衡个问题。1972年，杨树浦水厂拿原有个慢滤池改造成制水能力每天7.23万立方米个低程滤池。1974年起，杨树浦水厂利用慢滤池场地，改造斜管沉淀池搭低程双阀滤池，形成每天供水量15万立方米个净水生产流水线。1975年，杨树浦水厂新造每天进水能力100万立方米个6号岸边式进水口。1973年到1975年，川沙县建筑公司承建，对水厂进行其他改进，拿2座慢滤池改造成双阀式快滤地，滤水面积共2800平方米；新造10只快滤池，滤水面积共700平方米；拿全厂原有个二级泵房个老式蒸汽水泵机组一律改成电动水泵机组，电动水泵机组总数增加到20台；新造个岸边式取水工程采用板桩引水渠道，拿水引到岸边新造个一级泵房吸水井。改扩建工程竣工以后，水厂平均净水能力超过120万立方米，二级泵房总出水能力每天180万立方米。

因为黄浦江中下游污染越来越严重，1984年开始，上海市人民政府来勒黄浦江上游临江段设计修建新个取水口，1987年正式投产。此外，1986年11月开始，杨树浦利用厂东区慢滤池场地，造仔1条低程滤池生产流水线，1988年12月竣工，日供水量10万立方米。水厂个蒸汽设施从20世纪70年代开始陆续淘汰，1983年淘汰脱阿末一台。水厂北面原先个慢滤池场地先后变成其他生产设施搭职工住宅，水厂面积相应缩小。1987年黄浦江上游引水工程（一期）搞定，杨树浦水厂改用上游原水。

20世纪90年代，水厂体制改革，设水泵水和净水生产车间，办修理厂、安装部、服务经营部。1994年11月，水厂投资4800万元人民币改造129号滤池，日供水能力提高5万立方米。1995年水厂有4座进水口，20台进水水泵机，8座沉淀池，16台次步水泵机，3组普通快滤池（26格），28座低程快滤池，7座清水池（容量2万立方米），23台出水水泵机，14支最大口径2米个出厂管。1996年，水厂平均每天供水量124.4万立方米，最大日供水量153万立方米。2003年，有10座絮凝沉淀池，必过基础设备蛮老个。2012年，水厂沉淀池有11座，另有7座64格快滤池，49台进出水机组。杨浦区土地规划局组织专家对杨树浦水厂个扩建方案展开调研。

2020年5月22号，杨树浦水厂启动深度处理改造工程，2024年通水。改造完成以后，杨树浦水厂每天畀300万名上海市民提供120万立方米个饮用水，水质也有弗小个提升。

结构

杨树浦水厂来勒杨树浦路830号，南面是黄浦江，占地12.9万平方米，最大用地曾有25.9万平方米，建筑面积9.3万平方米。整体建筑风格是英国传统城堡样式，承重墙用清水砖墙，中间嵌有红砖腰线，周围墙身压顶雉堞缺口，压顶、窗框、腰线用个侪是水泥。水厂以杨树浦路为界好分成南北两区，南区为生产区，一进去就是幢3层楼个办公大楼，左右两边是水库搭出水车间，西面是修理车间，黄浦江边是进水车间、制水药剂加注间、化验室，挺下来是滤池；北区东面是水库、滤池，西侧有保健大楼，挺下来是仓库搭仔堆场。

相关活动搭保护

职工培训

1926年，水厂畀厂内职工开辟小足球场。1926年，英商上海自来水公司来勒水厂里向创办杨树浦学校，是供水行业个职业学堂，也是上海市顶早个供水职业学校，毕业生大多数侪留勒杨树浦水厂里向。1941年，日本人占领杨树浦水厂，学堂停办。1955年公司职工业余学校总校成立，杨树浦水厂里向设有分校。1965年开始，上海市自来水公司来勒杨树浦水厂里向开办半工半读给水专业技术训练班，培养机电检修搭水厂运行中级工人，学制3年。1987年，杨树浦水厂成为上海市高校学生实习点。

科学研究

1953年开始，杨树浦水厂自行生产制造水表零件，仿制水表搭美式真空加氯机。1956年，杨树浦水厂研制成功比光式浊度仪。1968年，比光式浊度仪个相关技术生产转交畀上海水表厂。1980年到1981年，杨树浦水厂帮上海第二光学仪器厂共同研制成功好连续反映自来水搭原水浊度变化个ZDJ—1型水质浊度计，1982年获得上海市公用事业管理局颁发个技术改进二等奖。

环境保护

光绪九年（1883年），水厂刚刚改建好就开仔绿地，是上海最早进行厂区绿化个单位之一。1982年，上海市杨浦区政协会议组织对杨树浦水厂个排污问题展开视察，作出专题报告。杨浦区环保办公室还来勒杨树浦水厂里向设置首批大气环境质量监测点。

保护工作

1916年，刚成立弗久个万国商团海事队来勒杨树浦水厂架设机枪保护厂区。

1989年9月25号，杨树浦水厂成为上海市文物保护单位个优秀近代建筑，保护范围是主体建筑周围30米，控制建设地带是全部厂区用地范围。2013年3月5号，杨树浦水厂成为第七批全国重点文物保护单位。

参见

• 水厂
• 杨树浦
  • 杨树浦发电厂