中古漢語到吳語个語音流變

吳語是從上古漢語裡頭分化出來個，但是渠絕大多數個特點搭中古漢語是一脈相承個。從語音浪分析，吳語個聲母、介音搭仔韻母儕有邪氣多個特點與中古漢語密切相關。

聲母

伲吳語個聲母頂大個特點是保留仔中古漢語個全濁音（譬如“佩”、“大”、“從”、“期”、“紅”該些字個聲母），而與全清、次清鼎立，另外典型個吳語基本浪儕完整保留仔中古漢語個疑母鼻音，該兩點也是吳語區別於另外各支漢語個重要特點。中古漢語個舌頭音“端透定泥”（除脫金華東部南部郊縣端母讀泥、宣州定母讀齒齦顫音r或者閃音ɾ與象山“端透定”四等腭化三種情況）、喉音“匣影云以”、半舌音“來”勒大多數現代吳語裡頭儕基本浪嘸沒發生幾許變化。

脣音

中古漢語個脣音（幫滂並明）後頭個介音是三等合口或者是三等有合口傾向（“東”、“鍾”、“尤”韻）個字勒吳語裡頭已經變成功仔“輕脣音”f同v，少數字還保留重脣讀法（低地吳語一般只有少數並母明母字保留仔重脣讀法，上山片、處州片有部份幫母滂母字也讀重脣音）；中古漢語裡頭個清音“幫滂”對應輕脣音f，濁音“並明”對應輕脣音v，個勒中古漢語裡頭聲母弗同個“膚”搭“敷”，“武”搭“腐”勒大多數吳語裡頭已經是同音字哉。勒溫州閒話裡頭，假使輕脣音後頭是通攝或者宕攝，f搭v就進一步變成h搭ɦ哉。龍泉吳語整體保留仔中古明母（譬如“霧”音məɯ，“文”音mæ̃i）。宣州片個銅陵閒話個並母字統統變成功仔輕脣音v，個勒“排”音væ，“跑”音vaʊ，“盘”音võ。

例：

汉字	中古	低地吳語
飛	pʷɨi（條件：三等+合口）	fi
風	piuŋ（條件：三等+合口傾向）	foŋ
芳	pʰʷiɐŋ（條件：三等+合口）	fɑŋ/fɔ̃
峯	pʰioŋ（條件：三等+合口傾向）	foŋ
犯	biɐm（條件：三等+合口）	vɛ/væ̃
浮	biu（條件：三等+合口傾向）	vʏ/veɪ/vu
文	miun（條件：三等+合口）	vən
肥	bʷɨi	(白讀) bi（文讀）vi
防	bʷiɐŋ	(白讀) bɑŋ/bɔ̃ （文讀）vɑŋ/vɔ̃
無	mio	(白讀) m（文讀）vu/ɦu
尾	mʷɨi	(白讀) mi/ni（文讀）vi
晚	mʷiɐn	(白讀) mɛ/mæ̃ （文讀）ʔwɛ/vɛ/væ̃
問	miun	(白讀) mən（文讀）vən
物	miut	(白讀) məʔ（文讀）vəʔ
微	mʷɨi	(白讀) mi（文讀）vi
目	miuk	moʔ

案：中古明母輕脣化而形成個v聲母勒新派當中普遍消亡，蠻多個中派也弗分“戶”、“舞”。上頭個中古語音依據個資料是韻典網裡頭潘悟雲個擬音，後同。

舌上音

舌上音“知”、“徹”、“澄”三個聲母勒常蘇滬杭嘉湖紹七處個吳語裡頭儕統一同齒頭音個“精”、“清”、“從”合併哉，但是勒蘇州舊派、無錫中老派、衢州、金華、寧波、台州、溫州、麗水吳語裡頭儕發生仔分化。該種分化勒蘇州舊派搭仔無錫中老派吳語裡頭表現為“知組二等併入精組”搭仔“知組三等轉向捲舌音”；勒台州、溫州表現為“知組二等併入精組”與“知組三等併入章組（齦腭音）”；衢州個分化情況搭蘇錫相近，但是有部份知組二等字也轉入仔舌葉音；寧波個分法搭台溫相近，但是有部份三等字也併入精組哉。金華個白讀層與台溫個分法相同，而文讀層與杭州紹興吳語一樣，統一搭精組合併。麗水個分法與台溫相似，但同時部份韻尾為ŋ/k個字保留仔舌音個讀法（聲母為t/tʰ/d），語音浪更加接近於閩語，該種舌上音讀舌頭音個情況勒高地吳語個上山片裏向也是蠻常見個。中古漢語舌上音孃母勒吳語裏向搭泥母(細音)合併。

齒頭音

齒頭音“精”、“清”、“從”、“心”、“邪”五個聲母勒吳語分尖團個地區（蘇州、無錫、常州、嘉興部份轄縣（包括嘉善、平湖、海寧）、金華老派、臨紹小片少數地區中老派，雖然講台州、上山兩片還有蠻多場許拿尖團音分勒煞清爽，但是渠拉個分法同上頭六地個吳語是兩樣個，各組齒音個細音儕已經合併哉），基本浪是整體保留仔中古時期個發音(ts、tsʰ、dz、s、z，蘇州、上海等地dz/z合併)。溫州、寧波儕有部份細音字個聲母保留仔齒頭音個讀法，但是該些字個i介音已經普遍消失哉。勒弗分尖團個場許，該五個聲母後頭是洪音（開口呼、合口呼）個辰光，仍舊是中古漢語個讀法；假使後頭是細音（齊齒呼、撮口呼），渠就變成功仔齦腭擦音，搭仔腭化之後個牙音、喉音合併哉。

例：

汉字	中古	吳語新派上海閒話	吳語台州閒話
襄	siɐŋ	ɕiaŋ	ɕiã
香	hiɐŋ	ɕiaŋ	hiã

還有一個比較特殊個情況：勒弗分尖團個場許，齒頭音裡頭個邪母細音也弗與匣母四等、云母、以母同音，邪母細音讀ʑ，而匣母四等、云母、以母字個聲母大多數是ɦj。少數地區個新派（上海、寧波等）已經拿兩者混同哉。

濁齒音分化表：從邪

正齒音莊組

正齒音“莊”、“初”、“崇”、“生”、“俟”個分化情況搭舌上音知組相似，蘇錫常滬嘉湖杭紹八地吳語儕拿渠全部併進齒頭音裡頭去哉。衢州吳語裡頭按照中古等發生仔分化，即“莊組二等併入精組”搭仔“莊組三等轉向舌葉音”，但是“莊組三等轉向舌葉音”並弗徹底，實際浪轉向舌葉音個只有宕攝、山攝、臻攝字搭仔少數深攝、流攝字，另外莊組三等字已經併入精組；勒台州南部、溫州、江山該種分化表現為“莊組二等併入精組”與“莊組三等併入章組（齦腭音）”，但是“莊三入章”一般也弗是邪氣徹底；勒寧波則以莊精合併為主導趨勢，同時保留仔極少數“莊三入章”個讀法。但是，弗管是何裡一種分化個形式，幾乎儕因為莊組後頭介音容易脫落個特點，有一定數量個莊組三等字也併入精組哉（例：鄒、初、楚、所、色），同時亦拿極少數個莊組二等字混進三等字裡頭去哉（基本浪是江攝字：窗、雙）。勒多數吳語裡頭，莊組濁音併入精組後頭儕分化成dz/z兩個聲母，但是蘇州、上海等地吳語弗分dz/z。

濁齒音分化表：崇俟

正齒音章組

正齒音“章”、“昌”、“常”、“書”、“船”五個聲母勒大多數地區朆發生明顯個分化。常蘇滬杭嘉湖紹七處拿章組統一合併勒齒頭音精組裏向。蘇州舊派、無錫中老派吳語一般拿章組讀成仔捲舌音（兩地區別包括：宕攝字之前有無精組讀法（蘇有錫無）、假攝字之前是否併入精組（蘇併錫分）搭仔流攝字之前有無齦腭音讀法（蘇無錫有）），衢州吳語拿章組讀成仔舌葉音（i介音脫落）。勒台州、溫州吳語裡頭章組仍舊是中古個形態（齦腭音+i介音），但是兩地章組聲母之後加止攝開口、假攝個辰光基本上是與齒頭音精組合併哉，溫州閒話裡向章組聲母後頭加止攝合口、蟹攝、臻攝開口、梗攝、曾攝也會得讀成功精組。寧波閒話裡頭正齒音章組個分法還要複雜，首先是韻母為止攝開口、假攝個情況搭台溫一樣變成功仔精組哉，然後是臻攝合口、通攝、宕攝（少數例外如：敞、【老派】商）也併入精組，最後還有止攝合口、臻攝開口、咸山兩攝開口個文讀層也同精組，碰著另外韻母纔只會得讀齦腭音。金華吳語個白讀層與台州類似（只有假攝字個變化有點差別），大多數章組字儕保留仔中古個形態；而文讀層邪氣接近杭州、紹興，個了章組也併入仔精組。麗水吳語裏向韻母為止攝開口、臻深兩攝開口個辰光章組讀如精組，餘者保留仔中古漢語個形態。江山吳語裡頭章組基本上全部讀齦腭音，止攝開口字常常有齒頭音個讀法，另外字讀齒頭音個情況邪氣少，分佈也弗大有規律。上頭講個各地吳語裏向章組變成功精組個辰光，原來個i介音儕消失哉（有極少數章組字勒蘇州閒話裡頭習慣浪讀尖音）。濁聲母“常”“船”個分化嘸沒明顯規律，而且各地分法儕有區別。

濁齒音分化表：常船

牙音

牙音“見”、“溪”、“羣”、“疑”四個聲母勒現代吳語裡頭基本浪儕有洪細之分。主流個分法是“見”、“溪”、“羣”三個聲母後頭是碰著二等開口文讀、三等、四等就腭化成功仔齦腭塞擦音（三四等字也有少數例外，參見下底個表格），“見”、“溪”、“羣”一等、二等開口白讀、二等合口仍舊讀中古個牙音；疑母三四等一般會得腭化成齦腭鼻音，然後進一步與泥母（齒齦鼻音）合併，疑母一二等弗腭化，還是讀軟腭鼻音。杭州吳語，台州吳語搭仔上山吳語勒顎化浪明顯屬於例外：杭州閒話“見”、“溪”、“羣”二等開口、三四等和總腭化哉，一等合口字、二三四等字個疑母脫落同官話；勒台州閒話裏向，“見”、“溪”、“羣”後頭是撮口呼（對應中古三四等合口字）個辰光搭開口呼、合口呼一樣弗腭化（保留y介音），部份中老派見系塞音全部弗腭化，同時勒南台小片，咸山攝一等字一般儕有文白兩讀，白讀音同三等；上山片牙音四聲母儕是弗腭化個。銅陵吳語嘸沒全濁聲母g搭dʑ，低地吳語裡頭聲母是g搭dʑ個字就相應讀作ɦ搭ʑ。弗分尖團個場許牙音顎化形成個齦腭塞擦音搭齒頭音精組細音合併。有些見母字勒口語裏向會得濁化而轉向羣母(g)，尤其以二等字為主（例：“夾”、“鯁”與“絞”個白讀）。

例：

漢字	中古擬音	吳語蘇州閒話	吳語杭州閒話	吳語台州閒話	吳語溫州閒話
高	kɑu	kæ	kɔ	kɔ / kau	kɜ
監	kɯam	ke̞	tɕie	kɛ / kiɛ	ka
更	kɯaŋ	kã/ kən	kən	kã	ka/ kiɛ
腔	kʰɯɔŋ	tɕʰiɑ̃	tɕʰiɑŋ	kʰiã	tɕʰi
輕	kʰiɛŋ	tɕʰin	tɕʰin	kʰiɪŋ	tɕʰiʌŋ
匡	kʰʷiɐŋ	kʰʷɔ̃	kʰwɑŋ	kʰyɔ̃	tɕʰyuɔ
虧	kʰʷɯiɛ	tɕʰy/ kʰwɛ	kʰweɪ	kʰy/ kʰue	tɕʰy/ kʰaɪ
結	ket	tɕɪʔ	tɕɪʔ	kieʔ	tɕɪ
桂	kʷei	kwe̞	kweɪ	ky	tɕy
羣	ɡiun	dʑyn	dʑyn	ɡyɪŋ	dʑyoŋ
橋	ɡɯiɛu	dʑiæ	dʑiɔ	giɔ / giau	dʑiɛ
看	kʰɑn	kʰɵ	kʰe̞	kʰe / kʰie	kʰø
巨	ɡiɔ	dʑy	dʑy	gy	dʑy
弓	kiuŋ	koŋ	koŋ	kyuŋ	tɕioŋ/ koŋ
葵	ɡʷi	gwe̞	gweɪ	ɡy	dʑy
櫃	ɡʷɯi	dʑy/ gwe̞	gweɪ	ɡy	dʑy
五	ŋuo	ŋ/ ʔəʊ	ʔu	ʔŋ	ŋ
我	ŋɑ	ŋəʊ	ŋɔ	ʔŋo	ŋ
牙	ŋɯa	ŋɒ	ɦiä	ŋo	ŋo
岳	ŋɯɔk	ŋɔʔ	ɦyɪʔ	ŋɔʔ	ŋo
疑	ŋɨ	ȵi	ɦi	ȵi	ŋ/ ȵi
言	ŋiɐn	ȵiɪ/ ɦiɪ	ɦie	ȵie	ȵi
玉	ŋiok	ȵiɔʔ	ɦyɪʔ	ȵyuʔ	ȵyo
危	ŋʷɯiɛ	ŋwe̞/ ɦwe̞	ʔweɪ	ȵy / ɦue	ȵy
元	ŋʷiɐn	ȵyø	ɦyɔ	ȵyø	ȵy
月	ŋʷiɐt	ŋəʔ/ ȵyɪʔ	ɦyɪʔ	ȵyøʔ	ȵy
業	ŋiɐp	ȵiəʔ	ȵiɪʔ/ ɦiɪʔ	ȵieʔ	ȵi

案：上表中例字凡有文白異讀者皆先白後文。蘇州閒話個團音（“見”、“溪”、“羣”、“曉”腭化而成）個實際音位有些辰光搭齦後音tʃ、tʃʰ、dʒ、ʃ比較接近。

喉音

喉音曉母勒各支吳語裡頭個變化情況與見系塞音聲母個情況交關像，一般儕是按照“二等開口文讀、三等、四等腭化為齦腭擦音ɕ，一等、二等開口白讀、二等合口仍舊讀中古個喉音h”個規律， 而杭州、台州搭上山片也仍舊是例外，該兩個地方個情況儕好勒上頭尋著個。溫州閒話裏向有蠻多一等合口字（主要是臻攝搭山攝字，譬如“歡”、“忽”）也腭化哉。二等開口字個情況又相對複雜一些，因為有些字（譬如“赫”、“喊”）個近代官話讀音也是弗腭化個，個了吳語裏向該些字就嘸沒文讀哉。勒上海本地閒話、寧波閒話、諸暨閒話搭仔溫州閒話裡頭，有些辰光喉音聲母會得變成輕脣音聲母(f/v)：寧波閒話裡頭只有曉母後頭是遇攝一等該種情況h會得讀成功f（個了“膚”=“呼”）；假使韻母是遇攝一等或者果攝一等，上海本地閒話就拿曉母讀成f，匣母讀成v；假使韻母是止攝、遇攝、蟹攝、臻攝、山攝字（主要是一二等合口字，蟹攝三四等也有少數字脣齒化），諸暨閒話就拿影母讀成ʔʋ，曉母讀成f，匣母讀成v；勒溫州閒話裡頭，中古個曉母匣母一等合口字，除脫發生腭化個臻攝搭山攝，基本浪儕變成功仔f搭v哉。“云”、“以”兩個次濁聲母有少數字個濁音清化哉，譬如以母字“勇”、“以”、“演”搭仔云母字“往”、“永”勒多數吳語裡頭儕變成功仔清音哉，而該些字正好儕是上聲。以母脂韻合口字如“維”、“唯”、“惟”等勒蠻多吳語裏向聲母儕是v。

半齒音

半齒音日母勒吳語裡頭一般儕有按照開合口兩分個情況。日母合口搭日母開口魚尤兩韻（儕有合口個傾向）一般讀擦音z（嘸沒i介音），有舌葉音個場許讀ʒ（嘸沒i介音），台州閒話裡頭讀ʑ（保留i介音），讀塞擦音個地方邪氣少。日母開口（除脫魚尤兩韻）一般儕有文白兩讀，文讀同合口字個情況一樣是讀各類擦音個；白讀則保留仔中古早期（南北朝到盛唐）漢語個形態，讀作ȵ。雖然如此，還是有蠻多字傾向於文讀或者白讀個，個了另外一種讀法可能就弗大會得聽到。一般認為典型吳語越靠近官話區文讀使用率越高，使用個文讀也越接近官話。頂明顯個例外是杭州閒話，因為中古晚期漢語（中唐到北宋）搭仔近代官話對杭州閒話個影響邪氣大，一般來講日母是統一讀z個。像“二”、“而”、“耳”該種日母止攝開口字，多數吳語有保留鼻音個白讀（ȵi或者n）搭文讀ɦəɫ兩層（杭州閒話只有文讀層），台州、溫州個吳語裡頭該些字個聲母仍舊是早期文讀z。部份新派拿日母讀成功仔邊近音“l”或者捲舌近音“ɻ”，一般認為是受官話影響所產生個訛音。

介音

中古漢語一塌刮子有八種介音（四個等與開合口個組合），假使加上三等韻裡頭個重紐現象（一般認為兩類個介音是兩樣個），也可以講實際浪有十種介音（一開，一合，二開，二合，三A開，三A合，三B開，三B合，四開，四合）。絕大多數現代吳語個介音已經簡化成與四呼（開口、合口、齊齒、撮口）哉，有些場許嗰吳語（譬如杭州、義烏）會得有一兩個另外嗰介音，但是該種介音只好同少數特定嗰聲母搭韻母搭配，弗影響主流個四呼格局；湖州、蘇滬部份郊縣（譬如嘉定、崇明）嘸沒撮口呼，個了實際浪只有三呼。中古介音對吳語語音（尤其是韻母）個演變有邪氣大個影響，勒後頭個韻母部份還會得有詳細個介紹。

一等

中古一等開口字（嘸沒介音）勒多數吳語裡頭仍舊嘸沒介音（模韻因為高化是變成功仔u哉，但渠弗是介音），少數吳語方言（尤其是勒許臨紹地區搭台州地區）個部份一等字已經產生仔i介音。一等合口字（u介音）勒吳語裡頭兩分：勒脣音、舌頭音、齒頭音、半舌音聲母之後失去u介音併入一等開口；勒喉音、牙音聲母之後保留u介音（另外個聲母弗與一等合口搭配）。例外個情況包括：【宣州吳語、部份上海本地閒話】一等開口咸攝（əm、ɑm）高化為iɪ（或近似音），與咸攝三四等開口字合併（齊齒呼）；【台州吳語（南台小片）】“見”、“溪”、“羣”、“曉”四個聲母之後個一等開口咸山攝出現仔文白兩讀，白讀與同韻三四等開口字同音（齊齒呼）；【杭州吳語】一等合口字統一保留u介音（合口呼）；【寧波吳語（中新派）】齒頭音後頭部份咸山攝一等合口字（例：酸、算）轉入撮口呼，同時尖團合併；【溫州吳語】喉牙音聲母後頭u介音消失。

二等

勒現代吳語裏向，絕大多數中古二等合口字儕有介音w，而二等開口字一般嘸沒介音。勒喉牙音聲母之後，二等開口字基本浪儕有文白兩讀，白讀嘸沒介音，而文讀（因為受到近代官話個影響）有i介音。杭州吳語裡頭文讀占優勢，個了喉牙音聲母後頭個二等開口字儕有i介音。勒溫州吳語裏向，中古二等合口個u介音朆保留下來（譬如“關”音ka而“彎”音ʔva），但是中古二等開口個江攝與效攝字有w介音。

三等

中古三等字勒吳語裡頭一般有介音j（三等開口）或者ɥ（三等合口）。引發三等介音消失嗰環境主要包括：重脣音轉輕脣音，舌上音、正齒音、日母後頭，齒頭音後接通攝、止攝、蟹攝合口，喉牙音少數字。各種吳語三等介音消亡個程度也有蠻大個差異：上山片、金華白讀、處州片、台州片保留個三等介音邪氣多，低地吳語搭仔甌江片保留介音個情況雖然相差交關，但是總體來講儕有明顯個三等介音消亡，一般認為甬江片保留個三等介音亦要比另外低地吳語稍許多點。

韻母

通攝

原分屬中古一等（東一、冬）與三等（東三、鍾），勒多數吳語裡頭通攝舒聲字發音為oŋ，對應個入聲也就是oʔ（台州與紹興個實際讀音），除脫台州搭紹興，常熟、嵊州、開化、松陽、龍泉等地個吳語也儕有各式各樣個辦法拿通攝一等與宕江兩攝個入聲分清爽，而另外場許，譬如蘇錫常滬杭甬個吳語，通攝一等個入聲儕讀ɔʔ，個了就同宕江兩攝個入聲混勒一淘哉。勒衢州搭浙南山區接近閩語區個場許，通攝個讀音一般是弗圓脣個(譬如衢州個"ʌŋ/əʔ"搭仔龍泉個"əŋ/əʔ"，麗水則有əʔ/uʔ兩種形態個入聲)。另外還有少數吳語拿通攝鼻音個韻尾儕由ŋ變成功仔m（譬如縉雲個“ɔm”搭銅陵個“om”，也弗排除直接從上古漢語演變而來個可能性）。絕大多數現代吳語儕分弗清爽一等東韻與冬韻哉。勒大多數吳語裏向（包括滬蘇錫常杭嘉湖寧紹衢十處搭金華吳語個文讀層），脣音、舌上音（除脫孃母）、三組齒音、來母、日母（文讀）之後個三等通攝字儕變成功仔洪音（嘸沒介音），而與一等字同音哉。台州片吳語只有脣音、正齒音莊組、來母之後個三等通攝字變成洪音，溫州吳語亦多出齒頭音搭日母文讀兩種情況（三等通攝字會得變成洪音）；而江山吳語也有部份三等通攝字勒正齒音聲母搭來母之後仍舊保留仔i介音。除脫前頭講過個幾種情況，有些兒牙音三等通攝字（譬如弓、宮、供、恭、恐、共）勒多數吳語裡頭（除脫台溫兩地）也讀洪音。勒絕大多數吳語裏向，三等東韻與鍾韻也已經合併哉（溫州閒話裡頭保留三等介音個鍾韻字，尤其是白讀，一般嘸沒鼻音韻尾，音yɔ，個勒是與有鼻音個三等東韻字有區別個；勒東甌片另外地區，譬如瑞安、樂清，該種現象也比較常見）。

江攝

原為中古二等韻，勒多數吳語裡頭江攝舒聲字發音為ɔ̃，對應個入聲韻是ɔʔ，勒絕大多數地區同宕攝一等字同韻（除脫少數採用文讀音個字，如“腔”）。常州、常熟、丹陽、靖江、上海（中派搭新派）、杭州吳語拿該些字（舒聲字）讀成功仔弗圓脣個ɑŋ（或近似音），往往就搭梗攝二等字個白讀同韻哉。勒杭州吳語裏向，江攝入聲字前頭是喉牙音聲母個辰光（譬如“學”、“嶽”、“確”），介音會得變成功ɥ，而該些讀音對低地吳語個文讀層或多或少有影響。溫州搭舟山兩個地方個吳語江攝舒聲字個鼻音已經脫落。

止攝

原為中古三等韻（下底亦分“支”、“脂”、“之”、“微”四個小韻），止攝字勒吳語裏向個變化情況比較複雜，個了下底有四個小段分別介紹脣音、舌上音與齒音、喉牙音聲母搭仔另外聲母之後止攝字個語音演變。止攝字搭蟹攝一三四等字同音個情況勒各地吳語儕交關常見，部份地區仍舊保留仔局部對立（譬如蘇州ɿ只有止攝一源、寧波e基本浪儕來源於蟹攝一等字）。

除脫少數特例，脣音後頭個止攝開口字一般兩分，分韻條件有待考證，作興與近代官話個分韻有點關係。脣音後頭個止攝合口字弗發生分化，勒大部分講吳語個場許（包括杭州而弗包括溫州）仍舊是三等韻，音i，同時聲母變為輕脣音。

漢字	中古擬音	吳語常州閒話	吳語無錫閒話	吳語紹興閒話	吳語金华閒話	吳語麗水閒話	吳語台州閒話	吳語溫州閒話
卑	piɛ	pæe	pe̞	pe	peɪ/pɛ	pei	pi/pe	pai
避	biɛ	bij	bi	bi	bij	bi	bi	bei
皮	bɯiɛ	bij	bi	bi	bij	bi	bi	bei
彼	pɯiɛ	pæe/pij	pe̞	pi	pij	pei	pi	pei
屁	pʰi	pʰij	pʰi	pʰi	pʰij	pʰi	pʰi	pʰei
鼻	bi	biɪʔ/bəʔ	bɪʔ/bəʔ	bɪʔ	biə	beiʔ/biʔ	biɪʔ/bəʔ	bi/bei
悲	pɯi	pæe	pe̞	pe	peɪ/pɛ	pei	pi/pe	pai
鄙	pɯi	pij	pi	pi	pij	pi	pi	pei
美	mɯi	ʔmæe	me̞	me	meɪ	mei	mi	mei
眉	mɯi	mi	mi/me̞	mi/me	mi	mi	mi	mei
備	bɯi	bij	be̞	be	bij	bi	bi	bei
匪	pʷɨi	fij	fi	fi	fij	fi	fi	fei
未	mʷɨi	vij	mi/vi	mi/vi	mij/ɦuɪ	mi/vi	mi/vi	mei/vei

舌上音與齒音後頭個止攝字勒吳語裏向一般兩分，同時也有弗少三分個例子，主要依據是介音（開合口）與聲母。勒常州、上海（弗包括部分老派）、嘉興、湖州、杭州、紹興、金華、台州、麗水等地該些字兩分（除脫少數特例），開口字個韻母統一變成功仔舌尖前不圓脣元音（ɿ），合口字個韻母則有ø（上海）,y（台州）,ueɪ（杭州、金華、麗水）,e̞（常熟、紹興）等形式。蘇州、無錫、衢州、寧波四地個分法儕是三分，而且互相之間有對應關係，具體來講就是合口字一組（蘇錫e̞，衢州ɘɪ，寧波文白ɛɪ/ʮ），齒頭音搭正齒音莊組聲母個開口字一組（四地儕讀ɿ，寧波有蠻多章組開口字也讀ɿ），舌上音搭正齒音章組聲母個開口字一組（蘇州、無錫、寧波ʮ，衢州ʯ）。溫州閒話裡頭該些字雖然也是三分（ɿ，ei，ai），但是分法邪氣複雜，因為聲母、介音搭仔小韻儕對分韻有影響，簡單講就是莊組合口支韻字讀ai，精組合口與章組開口支韻字讀ei，另外字儕讀ɿ，但同時也有為數弗少個特例。勒上海（中新派）、湖州（亦包括桐鄉、餘杭），聲母為舌上音、齒頭音或者正齒音個止攝開口字，聲母為舌上音、正齒音章組或者是擦化日母個遇攝三等字，搭仔聲母相同個蟹攝三等開口字合併（譬如“四”、“世”、“恕”同音）。

漢字	中古音類	中古擬音	吳語蘇州閒話	吳語無錫閒話	吳語上海閒話	吳語寧波閒話	吳語衢州閒話	吳語台州閒話	吳語溫州閒話
雌	清母重紐四等開口支韻	tsʰiɛ	tsʰɿ	tsʰɿ	tsʰɿ	tsʰɿ	tsʰɿ	tsʰɿ	tsʰɿ
紫	精母重紐四等開口支韻	tsiɛ	tsɿ	tsɿ	tsɿ	tsɿ	tsɿ	tsɿ	tsɿ
斯	心母重紐四等開口支韻	siɛ	sɿ	sɿ	sɿ	sɿ	sɿ	sɿ	sɿ
徙	心母重紐四等開口支韻	siɛ	si	si	ɕi	ɕi	sɿ	ɕi	sɿ
隨	邪母重紐四等合口支韻	zʷiɛ	ze̞	dze̞/ze̞	zø	zɛɪ	zɘɪ	ʑy	zɿ/zei
髓	心母重紐四等合口支韻	sʷiɛ	se̞	se̞	ɕi/sø	ɕi	sɿ	ɕy	ɕi/sɿ/sei
支	章母重紐四等開口支韻	tɕiɛ	tsʮ	ʈʂʯ/tsʮ	tsɿ	tsɿ/tsʮ	tʃʯ	tsɿ	tsei
紙	章母重紐四等開口支韻	tɕiɛ	tsɿ	ʈʂʯ/tsʮ	tsɿ	tsɿ	tʃʯ	tsɿ	tsei
是	常母重紐四等開口支韻	dʑiɛ	zɿ	zɿ	zɿ	zɿ	zɿ	zɿ	zɿ
弛	書母重紐四等開口支韻	ɕiɛ	sʮ	ɖʐʯ/zʮ	sɿ	dzʮ	dʒʯ	sɿ	dzɿ
吹	昌母重紐四等合口支韻	tɕʰʷiɛ	tsʰʮ	tʂʰʯ/tsʰʮ/tsʰe̞	tsʰɿ	tsʰʮ/tsʰɛɪ	tʃʰʯ/tsʰɘɪ	tɕʰy	tsʰɿ
垂	常母重紐四等合口支韻	dʑʷiɛ	ze̞	dze̞/ze̞	zø	dzʮ/zɛɪ	dʒʮɘɪ	ʑy	dzɿ
睡	常母重紐四等合口支韻	dʑʷiɛ	ze̞	dze̞/ze̞	zø	zɛɪ	ʒʮɘɪ	ʑy	zai
知	知母重紐三等開口支韻	ʈɯiɛ	tsʮ	ʈʂʯ/tsʮ	tsɿ	tsʮ	tʃʯ	tsɿ	tsɿ
馳	澄母重紐三等開口支韻	ɖɯiɛ	zʮ	ɖʐʯ/zʮ	zɿ	dzʮ	dʒʯ	dzɿ	dzɿ
智	知母重紐三等開口支韻	ʈɯiɛ	tsʮ	ʈʂʯ/tsʮ	tsɿ	tsʮ	tsɿ	tsɿ	tsɿ
差	初母重紐三等開口支韻	tʂʰɯiɛ	tsʰɿ	tsʰɿ	tsʰɿ	tsʰɿ	tsʰɿ	tsʰɿ	tsʰɿ
衰	初母重紐三等合口支韻	tʂʰʷɯiɛ	tsʰe̞	tsʰe̞	tsʰø	tsʰɛɪ	tsʰɘɪ	tɕʰy/tsʰe	tsʰai
揣	初母重紐三等合口支韻	tʂʰʷɯiɛ	tsʰe̞	tsʰe̞	tsʰø	tsʰɛɪ	tsʰɘɪ	tɕʰy/tsʰe	tsʰai/tɕʰy
私	心母重紐四等開口脂韻	si	sɿ	sɿ	sɿ	sɿ	sɿ	sɿ	sɿ
次	清母重紐四等開口脂韻	tsʰi	tsʰɿ	tsʰɿ	tsʰɿ	tsʰɿ	tsʰɿ	tsʰɿ	tsʰɿ
自	從母重紐四等開口脂韻	dzi	zɿ	dzɿ/zɿ	zɿ	ʑi/zɿ	zɿ	zɿ	zɿ
醉	精母重紐四等合口脂韻	tsʷi	tse̞	tse̞	tsø/tse̞	tsɛɪ	tsɘɪ	tɕy	tsɿ/tsai
遂	邪母重紐四等合口脂韻	zʷi	ze̞	dze̞/ze̞	zø	zɛɪ	zɘɪ	ʑy	zɿ
脂	章母重紐四等開口脂韻	tɕi	tsʮ	ʈʂʯ/tsʮ	tsɿ	tsɿ	tʃʯ	tsɿ	tsɿ
視	常母重紐四等開口脂韻	dʑi	zʮ	ʐʯ/zʮ	zɿ	zɿ	ʒʯ	zɿ	zɿ
至	章母重紐四等開口脂韻	tɕi	tsʮ	ʈʂʯ/tsʮ	tsɿ	tsɿ	tsɿ	tsɿ	tsɿ
錐	章母重紐四等合口脂韻	tɕʷi	tse̞	tse̞	tsø	tsʮ/tsɛɪ	tsɘɪ	tɕy	tsɿ
誰	常母重紐四等合口脂韻	dʑʷi	ze̞	dze̞/ze̞	zø	zʮ/zɛɪ	zɘɪ	ʑy	zɿ
致	知母重紐三等開口脂韻	ʈɯi	tsʮ	ʈʂʯ/tsʮ	tsɿ	tsʮ	tsɿ	tsɿ	tsɿ
追	知母重紐三等合口脂韻	ʈʷɯi	tse̞	tse̞	tsø	tsɛɪ	tsɘɪ	tɕy	tsɿ
死	心母重紐三等開口脂韻	sɯi	si/sɿ	sɿ	si/sɿ	ɕi/sɿ	sɿ	sɿ	sɿ
師	生母重紐三等開口脂韻	ʃɯi	sɿ	sɿ	sɿ	sɿ	sɿ	sɿ	sɿ
帥	生母重紐三等合口脂韻	ʃʷɯi	se̞	sɑ	sä/se̞	se	sɛ	se	sa
旨	章母重紐三等開口脂韻	tɕɯi	tsʮ	ʈʂʯ/tsʮ	tsɿ	tsɿ	tʃʯ	tsɿ	tsɿ
水	書母重紐三等合口脂韻	ɕʷɯi	sʮ	ʂʯ/sʮ	sɿ	sʮ/sɛɪ	ʃʯ	ɕy	sɿ
癡	徹母（三等開口）之韻	ʈʰɨ	tsʰʮ	ʈʂʰʯ/tsʰʮ	tsʰɿ	tsʰɿ	tʃʯ	tsʰɿ/tɕʰy	tsʰɿ
恥	徹母（三等開口）之韻	ʈʰɨ	tsʰʮ	ʈʂʰʯ/tsʰʮ	tsʰɿ	tsʰɿ	tsʰɿ	tsʰɿ	tsʰɿ
置	知母（三等開口）之韻	ʈɨ	tsʮ	ʈʂʯ/tsʮ	tsɿ	tsɿ	tʃʯ	tsɿ	tsɿ
治	澄母（三等開口）之韻	ɖɨ	zʮ	ɖʐʯ/zʮ	zɿ	dzʮ	dʒʯ	dzɿ	dzɿ
似	邪母（三等開口）之韻	zɨ	zɿ	dzɿ/zɿ	zɿ	zɿ	zɿ	zɿ	zɿ
士	崇母（三等開口）之韻	dʐɨ	zɿ	dzɿ/zɿ	zɿ	zɿ	zɿ	zɿ	zɿ
史	生母（三等開口）之韻	ʃɨ	sɿ	sɿ	sɿ	sɿ	sɿ	sɿ	sɿ
之	章母（三等開口）之韻	tɕɨ	tsʮ	ʈʂʯ/tsʮ	tsɿ	tsɿ	tʃʯ	tsɿ	tsɿ
齒	昌母（三等開口）之韻	tɕʰɨ	tsʮ	tsɿ	tsɿ	tsɿ	tsɿ	tsʰɿ	tsɿ
市	常母（三等開口）之韻	dʑɨ	zɿ	ʐʯ/zʮ	zɿ	zɿ	zɿ	zɿ	zɿ

案：多音字已經按照“先白後文，先老後新”個規則排列；無錫閒話個捲舌聲母，一般是中老派有而新派嘸沒。

喉牙音聲母後頭個止攝字一般按介音（開合口）兩分，開口字仍舊是讀細音i（同時“見、溪、羣、疑、曉”五聲母腭化），合口字（譬如“貴”、“鬼”、“櫃”、“龜”等字）常常會得有文白兩讀，白讀搭遇攝三等（魚虞兩韻）同音（該類白讀南多北少，杭州頂少），文讀則是合口呼（介音為w）。衢州、溫州、麗水個分法是比較明顯個例外，因為渠拉個開口字亦要兩分，“見、溪、羣、曉”四個腭化個聲母一組，韻母變成功仔舌尖元音ɿ，而聲母也變成功仔相應個擦音搭塞擦音，另外聲母之後個開口字纔仔讀i。

勒舌頭音聲母（實際浪只有“地”一個小韻）搭仔來母（開口）後頭個止攝字韻母一般儕是i（絕大多數吳語），但是該些字個韻母勒溫州吳語裡頭是ei。來母合口止攝字個韻母則出現仔明顯個地區差異（除脫“淚”個白讀通行於多種低地吳語），譬如常州個æe，蘇州、無錫、上海個e̞，杭州、麗水個ei，靖江、嘉興、紹興、台州個e，寧波個ɛɪ，衢州個ɘɪ，龍泉個i，溫州個ei[白讀]/ai[文讀]，而該些字本身個介音w只有杭州部分老派、龍游、江山、開化等少數幾種吳語仍舊保留。日母止攝開口字經常有文白異讀個情況：保留鼻音（有些辰光韻母會得脫落）個白讀（杭州嘸沒該層）（ȵi或者ŋ）搭仔受近代官話影響而產生個文讀（韻母多為əɫ，但是杭州、常州等地，韻母為ɚ）。台州、溫州吳語裡頭該些字個文讀音接近中古末期搭早期官話個讀音，韻母為ɿ。日母止攝合口字搭仔正齒音止攝合口字個變化相近，而寧波、溫州等地個白讀音個韻母則是與魚虞兩韻一樣。

漢字	中古擬音	吳語常州閒話	吳語杭州閒話	吳語上海閒話	吳語寧波閒話	吳語台州閒話	吳語溫州閒話
兒	ȵiɛ	ȵi/ɦəɹ	ɦəɻ	ȵi/ɦəɫ	ɦŋ/ɦəɫ	n/ȵi	ŋ
爾	ȵiɛ	ɦəɹ	ɦəɻ	ɦəɫ	ɦŋ/ɦəɫ	ʔn/zɿ	zɿ
蕊	ȵʷiɛ	zʮæe	zʯeɪ	zø	ȵy/zɛɪ	ȵy	ȵy/zɿ
二	ȵi	ȵi/ɦəɹ	ʔəɻ	ȵi/ɦəɫ	ȵi/ɦəɫ	n/ȵi	ŋ
而	ȵɨ	ȵi/ɦəɹ	ɦəɻ	ɦəɫ	ɦəɫ	ɦn/zɿ	zɿ
耳	ȵɨ	ʔȵi/ʔəɹ	ʔəɻ	ȵi/ɦəɫ	ɦŋ/ȵi/ɦəɫ	ʔŋ/zɿ	ŋ/zɿ
餌	ȵɨ	ɦəɹ	ʔəɻ	ɦəɫ	ɦəɫ	ȵy/zɿ	zɿ

案：上頭張表格裏向弗包括訓讀。一部分寧波人“而”有文白兩音（白讀“ɦŋ”）。

遇攝

原分屬中古一等（模）與三等（魚、虞）。模韻字勒各地吳語裏向個分法從弗分化（杭州中新派）到四分（常州、蘇州、溫州等地），體現仔吳語語音個多樣性。模韻字個主體部分勒上海、杭州（中新派）、紹興、寧波、金華、麗水儕是統一讀u個，而丹陽閒話（讀əʊ）、松陽閒話（讀uə）裡頭該些字也弗發生分化。還有蠻多地方個吳語模韻個主體按照聲母發生分化（兩分），分化條件包括：【常州】搭【杭州（老派）】，齒頭音為一組（如“租”、“蘇”，韻母為ʮ），與另外聲母分立（讀u）；【常熟】、【台州】搭仔【溫州】，脣音、喉牙音為一組（如“布”、“顧”、“烏”，韻母為u），與另外聲母分立（常熟ɯ、台州əʊ、溫州øy），台州個轄境裡頭也有蠻多場許（臨海、仙台、溫嶺等）模韻是弗分化個；【蘇州】、【嘉興】、【湖州】、【衢州】，脣音為一組（如“布”、“普”，蘇州、湖州ʉ，嘉興、衢州u），與另外聲母分立（蘇州ɜʊ、嘉興ɘʊ、湖州əɯ、衢州ʊw），同時勒湖州閒話裏向，模韻字前頭個影母已經變成功仔脣音ʋ，個了“烏”、“塢”個韻母就是ʉ哉；【無錫】喉牙音為一組（如“古”、“虎”，韻母為u），與另外聲母分立（ʌɤ）；【江山】，泥來二聲母為一組（譬如“怒”、“路”），有u搭仔uə兩種讀法，另外字一般儕讀uə。常見個例外有以“五”為代表個疑母字搭仔以“暮”為代表個明母字。前頭一類字一般包括“五”、“午”、“伍”、“吳”個白讀（杭州閒話嘸沒該層白讀，溫州閒話裡頭“誤”、“晤”、“悟”也屬於該類字），吳語一般讀作自成音節個鼻音ŋ̩；後頭一類字一般包括“暮”、“慕”、“墓”、“募”、“模”搭同聲旁個“幕”（鐸韻），勒丹陽、常州、蘇州、上海（老派）、嘉興、寧波、台州、溫州等地，該類字個韻母搭仔另外脣音字個韻母是各樣個，渠拉個韻母有o/ɜʊ/ʌɯ等。勒蘇錫滬杭嘉湖台溫地區，遇攝一等與果攝一等完全或者部份合併。

除脫極少數字個弗規則變化（譬如蘇州、上海、嘉興等地“許”個滯古白讀ho搭仔低地吳語常見個“去”個白讀tɕi），中古漢語搭吳語個魚虞韻字音基本浪儕有邪氣明確個對應關係。絕大多數吳語裡頭魚虞兩韻已經合併哉（除脫嘉善閒話仍舊保留仔局部對立）。魚虞韻個主體部份一般包括聲母是舌上音、齒頭音、正齒音章組、喉牙音、來母、日母個字，主體部份弗分化個地區包括紹興（y）、金華（y）、衢州（ʯ）、江山（y搭yɛ兩讀並存，還有蠻多各個層次個存古白讀）、麗水（ʮ）、龍泉（y）、溫嶺（y）；兩分個地區包括常州、蘇州、無錫、上海、嘉興、湖州、杭州、寧波、台州市區，蘇錫常滬杭嘉湖七地拿舌上音搭正齒音章組（包括已經擦化個日母）分成仔一組（蘇錫常杭嘉ʮ，滬湖ɿ），另外聲母為一組（蘇錫常滬杭嘉y，湖i），上海、蘇州有些郊縣個吳語嘸沒撮口呼，個了就儕搭湖州閒話介拿y變作i；寧波、台州市區個分法是舌上音、齒頭音、正齒音章組（包括已經擦化個日母）為一組（儕讀ʮ），另外聲母為一組（儕讀y，但是兩地聲母弗一樣）；該些字勒溫州閒話裡頭四分（弗包括源於上古漢語搭仔古越語個白讀），即y、øy、ei、ɿ，分韻條件待考。勒蘇錫滬、常熟、紹興、湖州（包括桐鄉、餘杭），齒頭音後頭魚虞韻會得變成功i；蘇州、上海、寧波等地口語裡也常常拿來母後頭個魚虞韻（譬如“旅”、“慮”，注意“履”本身就是脂韻字）讀成i。聲母是脣音（乃歇一般讀f/v）、正齒音莊組個魚虞韻字個讀法搭模韻是一樣個，勒上頭一段儕有個。除脫常州、杭州，各地吳語“魚”個讀法一般儕交關特殊，勒多數吳語（大多數低地吳語搭金華、衢州、台州吳語）裡頭儕讀自成音節個ŋ̇，要麼就是拿渠當作疑母模韻字寔梗讀（譬如溫州個ŋøy，江山個ŋɯə，龍泉個ŋəɯ搭仔麗水個ŋɤɯ）。勒上海（中新派）、湖州（亦包括桐鄉、餘杭），聲母為舌上音、正齒音章組或者是擦化日母個遇攝三等字，聲母相同個蟹攝三等開口字，搭仔聲母為舌上音、齒頭音或者正齒音個止攝開口字合併（譬如“四”、“世”、“恕”同音）。

案：洛陽音從中古初期（南北朝）開始就弗分魚虞兩韻。

蟹攝

聲韻分類	中古韻母擬音	例字	吳語蘇州閒話	吳語上海閒話	吳語杭州閒話	吳語寧波閒話	吳語衢州閒話	吳語台州溫嶺閒話	吳語麗水閒話	吳語溫州閒話
咍泰（開）韻﹣脣音字	əi/ɑi	貝沛昧倍	e̞	e̞	eɪ	ɛɪ	ɘɪ	e	ei	ai
泰（開）韻﹣舌音半舌音齒頭音字	ɑi	泰賴帶蔡	ɒ	ä	e̞	a	ɛ	a	ɔ	a
咍泰（開）韻﹣其餘字	əi/ɑi	開來害慨	e̞	e̞	e̞	e	ɛ	ie/e	ɛ	e
灰泰（合）韻﹣脣音舌音半舌音字	uoi/ʷɑi	佩枚對雷	e̞	e̞	ueɪ/eɪ	ɛɪ	ɘɪ	e	ei	ai
灰泰（合）韻﹣齒頭音字	uoi/ʷɑi	崔摧碎最	e̞	ø	ʯeɪ	ɛɪ	ɘɪ	e	ei	ai
泰（合）韻﹣疑母字	ʷɑi	外	ɒ	ä	ue̞	a	ɛ	a（白）/ ie（文）/ ue（文）	uɔ	a
灰泰（合）韻﹣其餘字	uoi/ʷɑi	灰回塊會	ue̞	ue̞	uei	uɛɪ	uɘɪ	ue	uei	ai
佳（開）韻﹣喉牙音正齒音少數字	ɯæ	佳娃釵瘥	ɒ/o/iɒ	ä/o/iä	ɑ/iɑ/uɑ	o/a/ia/uɛ	ɑ/iɑ/uɛ	a/ua	uo/uɔ	o/a
佳（開）韻﹣其餘字	ɯæ	牌柴蟹涯	ɒ	ä	e̞	a	ɛ	a	uɔ	a
佳（合）韻	ʷɯæ	卦畫蛙媧	o	o	uɑ	uo	uɑ/uɛ	ua/uo	uo	o
夬（開）皆（開）韻	ɯai/ɯæi	排齋楷邁敗寨	ɒ	ä	e̞	a	ɛ	a	uɔ	a
皆（合）韻﹣喉牙音少數字	ʷɯæi	匯聵	ue̞	ue̞	uei	uɛɪ	uɘɪ	ue	uei	ai
夬（合）韻﹣匣母字	ʷɯai	話	o	o	uɑ	uo	uɑ	uo（白）/ ua（文）	uo	o
夬（合）皆（合）韻﹣其餘字	ʷɯai/ʷɯæi	乖怪壞快	uɒ	uä	ue̞	ua	uɛ	ua	uɔ/uɛ	a
祭（開）齊（開）韻﹣見溪羣曉母字	iɛi/ɯiɛi/ei	憩偈雞契	i	i	i	i	ɿ	i	ɿ	ɿ
祭（開）廢（開）齊（開）韻﹣另外喉牙音字	iɛi/ɯiɛi/iɐi/ei	藝刈詣奚	i	i	i	i	i	i	i	i
祭（開）韻﹣正齒音舌上音字	iɛi/ɯiɛi	制逝彘滯	ʮ	ɿ	ɿ	ɿ/ʮ	ɿ	i	ɿ/i	ei
祭（開）齊（開）韻﹣齒頭音	iɛi/ei	祭齊西濟	i	i	i	i	i	i	ɿ	ei
祭（開）齊（開）韻﹣其餘字	iɛi/ɯiɛi/ei	蔽厲低米	i	i	i	i	i	i	i	ei
祭（合）廢（合）齊（合）韻﹣喉牙音字	ʷiɛi/ʷɯiei/ʷiɐi/ʷei	衞彗穢喙慧桂	ue̞	ue̞	ueɪ	uɛɪ	uɘɪ	y（白）/ ue（文）	uei	u/y/ai
祭（合）韻﹣齒音舌上音字	ʷiɛi/ʷɯiei	歲稅綴贅	e̞	ø/e̞	ʯeɪ	ɛɪ/ʮ	ɘɪ	y	ʮ/ei	ɿ
廢（合）韻﹣脣音字	ʷiɐi	廢肺杮吠	i	i	i	i	i	i	i	ei
祭（合）韻﹣日母字	ʷiɛi/ʷɯiei	芮枘	e̞	ø	ʯeɪ	ɛɪ	ɘɪ	y	ei	ai

案：上頭嘸沒明顯分化條件而多音並存者，兹按照常見程度排列，個了排勒前頭個讀音比後頭個讀音常見。祭韻勒中古初期還有重紐三四等個區別，但是迭個區別勒吳語裡頭嘸沒保留，個了上頭“聲韻分類”朆再細分，渠拉韻母個細微區別可以參看“中古韻母擬音”。

對比上頭止攝個表格可知，蟹攝（除脫二等字）止攝合併是近古吳語發展個一大趨勢。咍泰兩韻個局部對立也是吳語韻母個特點之一，而低地吳語一般保留仔佳韻與夬皆兩韻個對立，至於另外重韻，譬如祭廢齊三小韻，已經徹底合併。杭州吳語、銅陵吳語拿一二等各小韻（除脫佳韻併入仔假攝）和總合併成一個韻母（杭州e̞，銅陵æ），該種現象勒另外吳語裡頭弗大常見。蟹攝一三四等字搭止攝字同音個情況勒各地吳語儕交關常見，部份地區仍舊保留仔局部對立（譬如蘇州ɿ只有止攝一源、寧波e一般源於蟹攝一等字）。勒上海（中新派）、湖州（包括桐鄉、餘杭），聲母為舌上音、正齒音章組或者是擦化日母個蟹攝三等開口字，聲母相同個遇攝三等字，搭仔聲母為舌上音、齒頭音或者正齒音個止攝開口字合併（譬如“四”、“世”、“恕”同音）。

山攝

舒聲字韻表

聲韻類別	中古韻母擬音	字例	吳語寧波閒話（老派）	吳語蘇州閒話	吳語上海閒話	吳語紹興閒話	吳語江山閒話	吳語台州閒話	吳語溫州閒話
一等開口字--齒頭音；二等開口字(喉牙音限白讀)；三等元韻合口字--脣音	ɑn/ɯan/ɯæn/ʷiɐn	殘班山間顏反萬	ɛ	e̞	e̞	æ̃	ã	ɛ	a
一等開口字--舌頭音、來母	ɑn	旦但難蘭	ɛ	e̞	e̞	æ̃	ɔ̃	ɛ	a
一等開口字--見母	ɑn	肝竿	i	ɵ	ø	ɪ̃	ɔ̃	e/ie	y
一等開口字--溪母	ɑn	看刊	i	ɵ	ø	ɪ̃	ã	e/ie	ø
一等開口字--疑母	ɑn	岸	e	ɵ	ø	ɪ̃	ɔ̃	e/ie	y
一等開口字--喉音	ɑn	漢寒翰安	ɛɪ	ɵ	ø	ɪ̃	ɔ̃	e/ie	y
一等合口字--脣音	ʷɑn	半滿	ũ	ɵ	ø	ɵ̃	iɛ̃/ɐ̃	ø	ø
一等合口字--喉牙音	ʷɑn	官歡	ũ	uɵ	uø	uɵ̃	yɛ̃/uɐ̃	uø	y
一等合口字--舌頭音；二等合口字--正齒音莊組	ʷɑn	短湍團斷篡撰	ø	ɵ	ø	ɵ̃	ɔ̃/uɐ̃	ø/uø	ø
一等合口字--齒頭音	ʷɑn	竄酸	ʏ	ɵ	ø	ɵ̃	ɔ̃/uɐ̃	ø/uø	ø
一等合口字--來母	ʷɑn	卵亂	œʏ	ɵ	ø	ɵ̃	ɔ̃/uɐ̃	ø/uø	ø
二等開口字--喉牙音文讀	ɯan/ɯæn	間鴈簡晏	i	iɪ	i	ɪ̃	iɛ̃	ɛ/iɛ	a
二等合口字--喉牙音	ʷɯan/ʷɯæn	關彎鰥幻	uɛ	ue̞	ue̞	uæ̃	uã	uɛ	a
三等開口字--舌上音、正齒音、日母	ɯiɛn/iɛn	纏展戰善然	i/ø	ɵ	ø	ɪ̃	iɛ̃	ie	i
三四等開口字（含元韻）--脣音、舌頭音、齒頭音、喉牙音、來母	iɐn/ɯiɛn/iɛn/en	焉見言田殿錢先篇邊連	i	iɪ	i	ɪ̃	iɛ̃	ie	i
三等合口字--齒頭音	ʷiɛn	全宣選旋	ø	iɪ	yø/i	yɵ̃/ɪ̃	yɛ̃	yø	y
三等合口字--舌上音、正齒音	ʷɯiɛn/ʷiɛn	轉篆傳專	ʏ	ɵ	ø	uɪ̃	yɛ̃	yø	y
三四等合口字--喉牙音	ʷiɐn/ʷɯiɛn/ʷiɛn/ʷen	娟權眷玄	y	iɵ	yø	yɵ̃	yɛ̃	yø	y

案：元韻本身是臻攝當中個小韻，但是因為渠變化個規律接近山攝，個勒就擺勒該搭一淘介紹。上海新派嘸沒uø、yø兩韻，個勒本身韻母是uø搭yø個字韻母就分別變成功仔ø搭仔y；清母一等開口字“餐”勒杭州市區以北個吳語區一般儕有圓脣個讀法，譬如蘇州tsʰɵ。

入聲字韻表

中古韻母擬音	字例	吳語蘇州閒話	吳語無錫閒話	吳語嘉興閒話	吳語紹興閒話	吳語金華閒話	吳語江山閒話	吳語台州閒話	吳語麗水閒話	吳語溫州閒話
ɑt	割葛喝渴	əʔ	əʔ	əʔ	əʔ/ɪʔ/øʔ	əʔ/ə	ɔʔ	eʔ/ieʔ	ɛʔ/uɛʔ/ɔʔ	ø/y
ɑt	達捺辣	aʔ	aʔ	aʔ	aʔ/æʔ	ɐʔ/ɐ	ɔʔ	ɛʔ	ɔʔ	a
ʷɑt	撥末	əʔ	əʔ	oʔ/əʔ	oʔ/əʔ	əʔ	əʔ/ɔʔ/iaʔ	øʔ	ɛʔ	ø
ʷɑt	括豁	uaʔ/ɔʔ	uaʔ	uaʔ/uoʔ	uæʔ/oʔ/uaʔ/uoʔ	uoʔ/uɐʔ	uaʔ	uɛʔ	uaʔ	o
ʷɑt	活闊	uəʔ/ɔʔ	uəʔ	uoʔ/uəʔ	uoʔ/uøʔ	uoʔ/uɐʔ	uaʔ/yɛʔ	uɛʔ	uaʔ	o
ʷɑt	掇撮奪	əʔ/ɵʔ	əʔ	əʔ/oʔ	oʔ	ɐ/oʔ/əʔ	əʔ/ɔʔ	øʔ/uøʔ	eiʔ/əʔ	ø/ai
ɯat/ɯæt	瞎轄軋獺札殺	aʔ	aʔ/iaʔ	aʔ/iaʔ	aʔ/æʔ/əʔ	uɐʔ/iɐʔ/əʔ/ɐʔ/ɐ/ə	ɔʔ/aʔ	ɛʔ	ɔʔ	a
ɯat/ɯæt	八拔	ɔʔ/aʔ	aʔ	aʔ/ɔʔ	aʔ/æʔ	iɐ/ɯɐ/ə	aʔ	ɛʔ	ɔʔ	o/uo
ʷɯat/ʷɯæt	刮滑猾	uaʔ	uaʔ	uaʔ	uaʔ/uæʔ	uɐʔ	uaʔ	uɛʔ	uaʔ	o
ʷɯat/ʷɯæt	刷	əʔ	əʔ/ɪʔ	əʔ	əʔ/ɪʔ	oʔ/ʮyo/ʯɐ	yœʔ	yøʔ	yeʔ	ø
iɛt/ɯiɛt/et	列滅别屑切節鐵蔑	ɪʔ	ɪʔ	iəʔ	iɪʔ	iə	iɛʔ/əʔ	ieʔ	ieʔ	i/a
iɛt/ɯiɛt/et	熱傑結噎	iəʔ	iəʔ	iəʔ	iɪʔ	iə/iəʔ	iɛʔ	ieʔ	ieʔ	i
iɛt/ɯiɛt	舌折設哲撤徹	əʔ	əʔ	əʔ	əʔ/ɪʔ/aʔ/oʔ	əʔ	iɛʔ	ieʔ	ieʔ/eiʔ	i/ei
ʷiɛt	絕雪	ɪʔ	ɪʔ	yɵʔ/iəʔ	iɪʔ	ie/ye/yəʔ/ʯyoʔ	yɛʔ/ioʔ	yøʔ	yeʔ	y
ʷiɛt/ʷɯiet	說拙輟茁	əʔ	əʔ/yɵʔ	əʔ/oʔ	oʔ	ʯyoʔ/ʯyo/oʔ	yɛʔ	yøʔ	yeʔ	y
ʷiɛt	劣	ɪʔ	ɪʔ	iəʔ	əʔ/ɪʔ	iɐ/iə	iɛʔ	ieʔ/øʔ	ɛʔ	e
ʷiɛt/ʷɯiet/ʷet	缺悅蹶血穴抉	yəʔ	yɵʔ/yaʔ	yɵʔ/ioʔ	yoʔ	yəʔ/yə/ʯyoʔ	yɛʔ	yøʔ	yeʔ	y

案：一組字有好兩種讀法個辰光，該些讀音是按照頂常用到頂少用個次序排列個。

韻尾

迭個一節需要擴充

聲調

迭個一節需要擴充

參考資料

• 韻典網《廣韻》（繁体中文）
• 吳音小字典（吳語）
• 方言字音及歷史比較 档案，存勒互联网档案馆当中。（2016年3月13号）（中文）
• 張林，謝留文. 安徽銅陵吳語記略. 北京：中國社會科學出版社，2010
• 徐越. 浙北杭嘉湖方言語音研究. 北京：中國社會科學出版社，2007
• 丁邦新. 一百年前的蘇州話. 上海：上海教育出版社，2003
• 沈克成. 溫州方言韻略. 寧波：寧波出版社，2011