南京市

南京，简称「宁」，别称「金陵」、「石城」，勒到长江下游沿岸，乃歇是江苏省个省会。南京是“六朝古都”，有交关丰富个历史遗存搭仔自然景观。

历史

六朝古都

三国辰光孙权定都来勒此地，名曰“建业”，到了西晋末年，北方有五胡乱华，大量门阀逃跑来到南方，拿南京当做首都，先后建立了六个联系个政权。南京迭个辰光邪气发达，城市人口有好几十万。六朝存在个辰光奠定了南京后头文化个底蕴。从此之后，南京也被人家称为六朝古都。

南朝后期佛教邪气发达，号称“南朝四百八十寺”，南梁侯景之乱一把火侪烧脱了。隋朝辰光踏平健康，改名“蒋州”。

隋唐宋

箇辰光南京发展比较缓慢，成为诗人怀古个所在，著名个李白、杜甫、杜牧侪以南京为题材，写过著名诗篇。

南京后来个发达搭五代十国关系交关大。南唐建立之后，又选南京做了伊拉个首都，从此南京以秦淮河城南地区为核心发展，成为明朝南京城个基础。到宋朝辰光，南京成为中等规模个城市，虽然地位搭后起个杭州还有苏州、绍兴弗好相比，但依然具有重要地位。江南东路个首府就摆勒南京。后头个赵构来勒往南逃跑辰光，也曾经拿南京当过行在。

帝国京城

主文章：应天府（明朝）

蒙古人统治后期，南京被淮西个朱元璋占领，朱元璋来勒争夺统治权个斗争当中获胜，南京也成为帝国个首都。朱元璋为了标榜伊自家个正统性，来勒南京大兴土木，先后修造了南京明城墙，南京故宫,朝天宫，瞻园等景观。北京个紫禁城，就是拿南京故宫当做模板个。伊死脱之后，就葬到紫金山高头个明孝陵.明帝国来勒南京修造交关建筑物，虽然后头拿首都迁移到北京，但南京作为留都，还是拥有老高个地位，六部侪复制过来，国子监也保持原样。让南京个秦淮河成为才子佳人荟萃个场化。到明朝中后期，南京进一步发达，邪气多个才子佳人侪来勒此地流连忘返，著名个柳如是、董小宛、李香君等，侪留下千古传诵个爱情故事。

东南重镇

到了清朝辰光，南京成为帝国统治江南个重镇。也是两江总督、江宁将军个驻地。老早明故宫个区域被划分成满城，来勒现今长江路区域修造江宁织造署。南京保持了伊东南第一大城市个地位。清朝皇帝拿此地专门设置一些官职，比如江宁布政使，江宁将军等，让南京主要负责管辖江淮地区个各项事务。搭吴越地区各江苏巡抚等分开来，南京具有特殊个地位。来勒迭个辰光，南京也保持江南文化中心个地位，邪气多个退休官员搭文人，侪选择南京作为自家个养老基地。比方讲：袁枚就来勒南京修造随园养老。一些文人也来到南京，吴敬梓就是来勒南京写出儒林外史个。迭部小说也对南京个辰光个市井生活有充分描写。1842年，来勒南京签署个南京条约，让帝国进入近代史阶段。到1850年代，南京被广西发端个太平天国占据，城市经历浩劫，一直到1864年才由湘军收复。之后南京开始缓慢近代化。

国民政府首都

1911年年底，帝国爆发辛亥革命，南京被革命派选了当做首都。1912年元旦，孙中山来勒南京老早个两江总督衙门宣誓就职，成为中华民国第一任大总统。临时政府来勒南京运作三个多月头，颁布了交关新式法令。奥1912年6月，北洋派正式拿首都搬回北京哉。南京由黄兴担任留守，弗过黄兴没有军队，没过多少辰光辞职回湖南，南京来勒二次革命当中被北洋占领，一直到1926年国民党发动北伐战争之后，蒋介石准备搭汪精卫对立，才重新选择南京作为伊自家政权个首都。从此开始南京所谓个黄金十年.

为了标榜自家个正统性，淡化革命夺权个色彩，蒋介石对南京个规划相当重视，请来顶级设计师规划城市，新开马路，种植梧桐树。又修造了交关带有传统风格个建筑物。

南京是中国个主要旅游城市之一。也是中国个重要文化教育中心。人称「六朝古都」，「六朝」是孙吴、晋、刘宋、齐、梁、南陈、南唐、明、中华民国。