浙东运河

浙东运河，又叫杭甬运河，中国浙江省境内一条运河，西起杭州市滨江区西兴街道，跨过曹娥江，经过绍兴市，东到宁波市镇海区甬江入海口，全长239公里。

大运河
浙东运河
浙东运河绍兴柯桥太平桥附近河段
全国重点文物保护单位 中华人民共和国国务院公布
所在	浙江省（杭州市、绍兴市、宁波市）
分类	其他
时代	春秋-清
编号	6-0360
登录	2013年3月

运河顶顶早凿个部分是勒拉绍兴市个山阴故水道，春秋时期开始造个。西晋个辰光，会稽内史贺循主持开挖西兴运河，后些来跟曹娥江东面个运河连起来，形成西起钱塘江，东到东海个只运河。南宋建都临安，浙东运河是伊个辰光重要个航运河道。到近代，运河个作用逐渐消失。2002年，浙东运河全线进行改造，2007年底部分通航，到2013年年末通航。

因为浙东地区南高北低，多南北走向个河浜，故咾东西走向个浙东运河会得穿过多条河浜，造仔交交关关碶闸搭仔堰坝设施，跟噶多个桥一道是浙东运河个特色。2013年5月份，浙东运河排进第七批全国重点文物保护单位里向，是大运河项目个一部分。2014年，伊同京杭大运河、隋唐大运河一道列进世界遗产名录里向。

运河走向

浙东运河历史走向示意图

历史浪，浙东运河西起杭州市滨江区西兴街道，往东一路经过萧山区、柯桥区，勒拉钱清街道同钱清江故道交汇。接下来运河向东南进越城区，经过绍兴老城区，勒拉上虞区同曹娥江交汇。箇段从西兴到曹娥江个运河又叫“西兴运河”或者“萧绍运河”。运河勒拉曹娥江东岸分成功两支。北面条又叫“虞余运河”，从曹娥江东岸上虞百官个上堰头一路向东到余姚市曹墅桥连拉姚江。南侧只又叫“四十里河”，从曹娥江出发，勒拉通明坝流进姚江，还有后新河、十八里河咾啥个一道跟咾流。

主航道变成功姚江以后，勒拉丈亭镇分出“慈江”，勒拉宁波市海曙区高桥镇大西坝分出支流叫“西塘河”。干流经姚江搭仔奉化江，勒拉宁波三江口变成功甬江，阿末勒拉镇海区招宝山东面流进东海。慈江么自西向东，勒拉慈城南面貤分出支流“刹子港”，勒拉小西坝联咾姚江；而慈江干流经过化子闸，名字改成功“中大河”，经过江北区搭仔镇海区，流进甬江。西塘河向东到宁波老城望京门，连咾护城河搭仔城里向个河水系，连拉奉化江。宁波箇段造唻内外江平行是生怕外江潮汐，顺带便截弯取直。

21世纪初，改造过个运河从钱塘江三堡船闸出发，改走钱塘江、浦阳江、西小江进老底子个萧绍运河到曹娥江，再往东通过四十里河进姚江，阿末走自然河道到甬江口。

运河历史

浙东地区降水充沛，故咾修运河比较便当，弗需要特谓拉人去做，也弗常记录下来。浙东运河个历史可能好追溯到春秋时期个山阴故水道。根据《越绝书》，山阴故水道从范蠡造个山阴大城（大致相当于今朝个绍兴老城）个东郭门出发，到上虞东关练塘，长20.7公里。晋惠帝个辰光，为咾满足农地需要，会稽内史贺循主持修建从钱塘江东岸个西兴到会稽城个西兴运河。箇两条运河加起来，再加浪姚江、甬江咾啥，就是浙东运河。唐朝中叶，江南运河沿线航运一天天旺起来，浙东地方官员主持疏浚浙东运河，增设堰碶设施，开挖新个河道，疏浚鉴湖，让伊变成功运河重要个水源地。

南宋定都临安，宋金对立，导致京杭大运河个航运断开来，浙东运河搭仔江南运河变成功南宋个生命线。在家浪南宋重视对外贸易，庆元府（今朝个宁波）是伊个辰光重要个对外贸易港口，故咾南宋政权特别重视浙东运河，整治过好几埭哉，改善航运条件。根据《嘉泰会稽志》，伊个辰光浙东运河勒拉萧山县搭仔上虞县好通行二百石个船，勒拉山阴县搭仔姚江好通行五百石个船，运河航运条件搭仔繁荣程度侪是伊个天花板。

元朝明朝，官方一直保持对浙东运河个保养维护，浙东运河一直呒没废脱。明朝个辰光，因为老底子拿运河隔开个钱清江淤咾哉，修缮以后萧山曹娥当中个水路弗再畀淤泥堵牢哉。明朝浙江各地海塘个建设搭仔海涂个开发也勒拉运河周边形成交关个湖。清朝，浙东运河勒拉走下坡路，运河沿线个驿传经常性撤销合併，跑个船大小弗过几十石。清末，轮船搭仔萧甬铁路个出现弗断取代浙东运河。中华人民共和国成立以后，浙东运河疏浚过几趟，增设设施方便运输搭仔灌溉。

20世纪末，开发宁波港让重修浙东运河箇桩事体重新畀人想起来。2009年，浙东运河改建工程完工，到2016年1月全线通航500吨级个船。到2020年，内河集装箱吞吐量超过5000只标准箱。

运河作用

浙东运河历史浪个作用好大致分成功航运、灌溉、漕运、水驿四只部分。

航运

西兴过塘行码头

航运是浙东运河重要个功能。因为杭州湾潮水忒猛哉，故咾古代浙东个船经常性走浙东运河去杭州。南宋，浙东运河曾是王朝对外贸易个重要通道，联络海上丝绸之路。外国使节也经常性从宁波登陆，经浙东运河到临安。明代，宁波是接待日本贡船个唯一港口，贡品经浙东运河搭仔京杭大运河好到京师。浙东运河个民间航运同样邪气发达。直到20世纪50年代末，浙东运河浪有发达个短程航运。20世纪80年代，道路条件改善哉，运河个作用纔缩水交关。

灌溉

浙东运河个一大重要任务是方便两岸个地浇水。西晋辰光个西兴运河一开始就是为咾灌溉。南朝个辰光造仔4座堰埭，唐代元和十年（815年）造仔运河官塘，完善浙东运河积水排涝个功能。后头个朝代历代修缮运河个设施，方便浇水种地。

漕运

浙东是中国古代重要个漕粮征发地区，故咾浙东运河承担漕运个重要任务。唐代开始便是官办个，粮食经浙东运河到西兴，横渡钱塘江，经京杭大运河送到京城。元代实施漕粮海河联运，宁波设立漕粮海运管理机构，浙东运河个漕粮改经宁波（庆元）港走海路。明代走浙东运河个漕运还是邪气发达个。清代咸丰年个辰光再走海路海漕，运河漕运功能废脱。

水驿

浙东运河另外一项重要功能是驿道。运河个起点西兴曾有西兴驿，经浙东运河转发各地来往绍兴、宁波、台州个公文。还有递铺，做邮政业务。宋朝，沿运河曾设置12处驿站，明朝开始一步步撤销到只挺西兴驿。光绪三十二年，近代邮政建立取代递铺。宣统三年，清帝退位，驿站撤消。

文化影响

勒拉梁祝里向，梁山伯寻同门师妹祝英台走个就是浙东运河。浙东运河西段因为李白、杜甫、贺知章、王维等四十多位唐朝出名个诗人来过，跟曹娥江、剡溪、天姥山、天台山咾啥一道构成“浙东唐诗之路”。唐代以后又有陆游、范成大、秦观、朱彝尊、鲁迅咾啥个有名气个文人走过浙东运河，留下来弗少作品。1488年，朝鲜官员崔溥因为碰着暴风，漂到中国台州，后些来从宁波经过浙东运河搭仔京杭大运河从北京回到朝鲜，伊拿路浪向看到个写成功《漂海录》，是研究中国明朝个重要资料之一。

现代开发

中华人民共和国交通运输部2007年颁布过《全国内河航道与港口布局规划》，里向拿浙东运河-京杭运河定成功长三角航道网络里向个骨干线。

浙东运河个改建是1983年提出个，伊个辰光个改造让伊个通行能力达到40吨。2002年，针对老底子运河个堰坝多，通航吨位小，弗适应现代物流需求个缺点，浙东运河开工改造。改造后个浙东运河标准是四级航道（通行500吨级货轮），西起钱塘江西岸个三堡船闸，经过钱塘江、浦阳江、西小江、曹娥江、四十里河、姚江、甬江，勒拉甬江口进东海。工程拢总造仔130余座桥、8座船闸，改造沿线铁路、公路、受影响个房子搭仔通航标志。2009年9月份完工，是中国大陆历史上单项工程投资规模顶顶大个内河改造建设项目。